CASH na ang ihatag sa Commission on Elections isip honorarium ngadto sa moserbisyo nga mga sakop sa Electoral Board (EB) sa mismong adlaw sa piniliay karong Mayo 13.
Sumala ni acting Cebu Provincial Elections Supervisor Atty. Jerome Brillantes nga sayon na alang sa mga magtutudlo kon cash ang ilang madawat nga honorarium ug dili ipaagi sa cash card.
“Kay nakita man gud nato dili inconvenient gud sa atoang mga Ebs. Ang katong cash card, sometimes way sud, ig adto nila didto (sa ATM) offline. Luoy sab ang atoang mga maestra, most likely wala ra bay mga ATMs (automated teller machines) sa ubang mga lungsod,” pasabot ni Brillantes.
Matod niya, P6,000 ang madawat nga honorarium sa mga chairman, P5,000 sa poll clerk ug P4,000 sa 3rd member.
Siya niingon madawat ang honorarium pipila ka adlaw o usa ka semana human sa eleksyon nga iapudapod sa mga election officer. Kuhaan pa kini og buhis, sigon ni Brillantes.
Siya nidugang ang mga miyembro sa EB nga nisalmot seminar-training makadawat usab og cash honorarium nga tag P2,000.
Apil sa tulo ka adlaw nga training kon unsaon paggamit sa voter’s registration verification machine voter’s registration verification machine (VRVM) nga maoy mosusi sa fingerprint sa botante aron maseguro nga siya rehistrado nga botante.
Ang upat ka semana nga seminar-training gisugdan niadtong Marso 4, diin gi-by batch ang pagbansay sa mga moserbisyo isip mga miyembro sa EB.
Human sa training, matod ni Brillantes, himuon na ang pagbaklas sa mga tarpaulins, streamers ug ubang campaign materials sa mga kandidato nga wala motuman sa mga lagda.
Karong Marso 29 magsugod na ang campaign period alang sa lokal nga mga kandidato.