NAPUNO ang usa ka L300 van sa mga tarpaulin, poster, o campaign materials sa mga senador, ug mga partylist sa gipangtantang sa mga sakop sa Mandaue City Commission on Election (Comelec) diha lang sa daplin sa national road sa siyudad.
Gihimo kini sa Comelec Mandaue, uban ang pipila ka mga sakop sa Department of Public Works and Highways, (DPWH), diin anaa usab ang mga pulis sa siyudad alang sa ilang seguridad.
Nahitabo ang Oplan-baklas niadtong Biyernes, Marso 8, sa alas 2:30 sa hapon hangtod sa alas 6:30 sa gabii.
Ang maong campaign posters anaa sa mga dili designated posting areas sama sa mga poste sa kuryente, ug mga kahoy.
Gihulagway ni Jacqueline Reuyan, ang assistant election officer sa Mandaue City Comelec, nga daghan sa campaing posters sa mga kandidato sa national nga posisyon ang wala sa common poster areas ug ang uban mga oversized.
Kasagaran niini iya kang magpapili pagka-senador, Imee Marcos, Juan Ponce Enrile, anaa usab sa Ocho diretso nga kandidato, sa mga partylist nga ICare, 1-Pacman partylist PBA ug uban pa.
Ang mga gipangtangtang nga campaign posters ang anaa sa highway sa Barangay Jagobiao, Basak, Alang-alang, Umapad, Paknaan.
Giangkon ni Reuyan nga aduna pa untay daghan nga ilang nakita, apan naabtan na sila og ngitngit.
Hinungdan nga awhag ni Reuyan sa mga pulitiko ug sa supporters niini nga unta sila na mismo ang mangunay sa pagpatangtang niini agi og pagsunod sa balaud.
Ang mga hingtungdan nga politiko ang gipadad-an na og sulat sa Comelec kalabot sa kalapasan niini usa ka semana, human sa pagsugod sa National campaign period niadtong Pebrero 12.
Apan giingon nga pipila lang kanila ang nituman, sa pagtangtang.
Ila usab na nabantayan karon nga ubay-ubay kining’ mga campaign posters sa mga local nga kandidato nga wala sa designated posting areas, ug mga oversized usab.
Hangyo na usab nila sa mga lokal nga kandidato sa dakbayan sa Mandaue, nga sa dili pa sa pagsugod sa lokal nga pagpangampanya, unta mosunod na usab sila, sila na mismo mobaklas.
Halos tibuok adlaw sa Sabado, Marso 9, ang mga kawani sa Comelec Mandaue ang nihimo sa pagpang-gunting kun pagguba sa mga gipangbaklas nga campaign posters, una kini hingpit nga ilabay.
“It was in coordination with DPWH and PNP personnel. Only tarps/posters of national candidates were subject of the baklas, if these were oversized and/or outside common poster areas. Another Oplan baklas is scheduled on April for local candidates,” text message ni Atty. Anna Fleur Gujilde, ang election officer sa Mandaue City, sa Superbalita Cebu... (FMD)