IPAPAAYO sa Bureau of Fire Protection sa kagamhanan sa lalawigan sa Sugbo ang fire detection and alarm system sa Legislative Building sud sa compound sa Kapitolyo human giingong wa kini mogana dihang nitumaw ang alarma sa sunog sa ikatulong andana sa edipisyo alas 11:04 sa buntag pagka Lunes, Marso 11.
Si SFO3 Emiliano Daño, fire investigator sa Cebu City Fire Department-Guadalupe Fire Substation, nibutyag nga base sa ilang inspeksyon sa maong edipisyo sa miaging tuig, wala mag-function ang panel board sa fire detection and alarm system.
Matod niya, ang panel board maoy mo-notify kon asa nga floor naay kayo o nasunog.
“According sa mga occupant diri, wa motingog ang ilang alarm,” sigon ni Daño dihang nahinabi sa mga tigbalita.
Ang mga bombero dali nga nitubag sa alarma sa sunog pagka Lunes sa buntag sa buhatan ni Provincial Board Member Earl Tidy, presidente sa Philippine Councilors League (PCL) Cebu Province Chapter, sa ikatulong andana sa Legislative Building ug giisa sa first alarm.
Sigon ni Daño sa ilang inisyal nga pakisusi, luag ang saksakanan ug ang gisaksak nga maoy nakamugna og spark hangtod nga nasunog.
“Gamay ra man ni, wa gani mi mabutang (damage), negligible ang damage ani. According sa staff didto, ang gisuplyan atong gikan sa outlet naa siyay gituslok nga extension cord padung didto sa ilahang tubig, water despenser,” asoy sa imbestigador sa bombero.
Ang nirespondi nga mga bombero wala na makapasirit og tubig kay napawong ra sa mga staff ni Oyas ang kayo alas 11:08 sa buntag gamit ang upat ka fire extinguihers.
Si Daño nipasabot nga gamay ra ang kayo hinungdan nga wa makabuto ang water sprinkler sa edipisyo.
“Kay ang sprinkler head naa siya’y filament nga gi-set nga temperature. Molanay na siya og init na kaayo,” dugang pagpasabot niini.
Apil sa ilang nabantayan sa edipisyo dihang giinspeksyon sa miaging tuig nga lisod again ang fire exit kay gikaon sa opisina ang hallway padung sa hagdanan ug dunay mga nag-ali nga lamesa, bangko ug ubang gamit.
“Kani siya nga hallway dapat open siya, ingon ani siya makalusot ta didto sa exit. Naay mga floor, naay exit pero moagi og opisina, moagi og session hall, dili nana matawag nato nga exit. Kay ang exit accessible anytime, dili siya moagi og door nga subject for blocking,” sumala ni Daño.
Sa Ainjeliz de la Torre-Orong, pangu sa Provincial Information Office, nga gituman nila ang mga rekomendasyon sa BFP human sa inspeksyon sa miaging tuig, usa na niini nga bantang na nga makita sa lainlaing mga buhatan sa Kapitolyo ang fire extinguishers.
“Sa kadako sa Capitol, dili mi mo-risk of not complying regulations like this. And we want also to set as an example sa other LGUs (local government units),” pahayag ni Orong.
Karong Miyerkules, Marso 13, subli nga inspeksyunon sa BFP kon gituman ba sa Kapitolyo ang ilang mga rekomendasyon ug makorihian ang unsay angay nga usbon subay sa gimando sa balaod sa Building Code. (SCG)