MIREHISTRO og perpektong 7.0 puntos si Bonn Rainauld Tibod sa iyang pagsakmit sa kampiyunato sa Jazz Chillin’ Open Rapid Chess Tournament niadtong Dominggo sa Jazz Chillin’ Restaurant & Music Lounge sa Brgy. Zapatera, dakbayan sa Sugbo.
Grabe ka impresibo ang gipakita ni Tibod gumikan kay duha sa iyang nabiktima mao ang top 2 sa ranking nga sila si National Master (NM) Merben Roque ug International Master (IM) Kim Steven Yap.
Si Tibod, kinsa lumad nga taga Toledo City, milupig sa No.2 ranked nga si Yap sa Round 3 unya iyang gipukan ang No.1 ranked nga si Roque sa Round. 5. Ning mga sangkaa, nagduwa si Tibod sa itom nga piyesa.
Ang ubang mga gipangbuntog ni Tibod mao sila si Anthony Paradela sa Round 1, Norman Olayvar sa Round 2, Anthony Makinano sa Round 4, Diego Caparino sa Round 6 ug Richard Natividad sa Round 7.
Si Yap midakin-as sa ikaduhang luna nga adunay 6.0 puntos unya ang nakakuha sa ikatulong dapit mao si Jave Mareck Peteros.
Isip kampiyon, si Tibod nakabulsa og P6,000, si Yap adunay P4,000, nakakuha og P2,000 si Peteros samtang P1,000 ang nadawat ni Roque.
Ang nagpasiugda sa torneyo nga si Atty. Raul Padilla nalipay sa kalampusan sa torneyo, nga nakadani og 73 ka mga partisipante.
Gibutyag ni Padilla nga plano niyang himuon kining quarterly tournament.
Ang nag-orgnisar sa torneyo nga si Engr. John Velarde nagpasalamat sa suportang gihatag sa Cebu Executives and Professionals Chess Association (CEPCA) Inc., Visayan Educational Supply ug ni Rene Abrea Boy Lim. (ESL)