WA GYUD makalusot ang usa ka halas nga banakon human nasakpan sa dihang nisaka sa usa ka panimalay didto sa Barangay Bonifacio, lungsod sa Bansalan, Davao del Sur.

Gilayong nasikop sa mga lumolupyo sa lugar ang maong halas kinsa unang nakapahimo og kaguliyang kanila gumikan sa ilang kahadlok nga sila na sab maoy mahimong biktima niini.

Nalisang kaayo ang nagpuyo sa maong balay, kinsa matud pa sa kapulisan nga di na buot magpaila, apan maayo na lang kay nakabantay dayon ang tag iya mao nga sa tabang sa ilang mga silingan, napatay ang maong halas.

Aron masayod ang otoridad sa nahitabo, gihatod ni Chelrad Carillo, pamuno sa tanod sa silingang Barangay Buenavista ang halas ngadto sa Bansalan Police Office.

Si Inspector Reniel Raotraot, deputy chief of police, nikanayon sa Sun.Star Superbalita nga ila karong gi-alerto ang katawhan sanglit sagad nga mogawas gyud ang mga malalang mananap sama sa bitin nunot sa kainit sa panahon.

"Mangita man god ni sila og bugnaw nga lugar, unya tubig nga mainom mao nga angay gyud magbantay kanunay," matod pa ni Raotraot.

Dugang ni Raotraot, kinahanglang mag-igmat ilabi ang katawhan nga anaa nagpuyo sa bukid ug duol sa kalasangan sanglit dinhi gyud magagikan ang mga halas.

"Kinahanglan sab nga i-maintain ang kalimpyo sa palibot aron di sila sudlon og bitin," pung niini.

Pipila ka adlaw lang ang milabay sa dihang namatay ang usa ka 30 anyos nga lalaki didto sa Barangay Managa human gipaak kini og banakon atol sa pagpanguha og dahon sa abaka.

Sayo ning bulan, laing mag-uuma ang gipatay og banakon didto sa Barangay Tinongtongan sa samang lugar.

Atol sa pagkapatay sa maong banakon, nakahimo pa og pasiaw ang katawhan nga nakakita sa maong halas pinaagi sa pag-ingon nga nasikop ug napatay ra gyud ang suspetsadong banakon.

Apan sigon sa otoridad, hayan daghan pa kini og kaubanan mao nga angay ang pag-amping matag takna kung anaa ka sa kabukiran.

Labaw nga gipasidan-an sa kapulisan mao kadtong mga mahilogon moadto sa sagbutang bahin atol sa kagabhion aron mangita og "damang" (spider) nga mao na sab karon ang nauso sa dapit.

Ang mga batan-on mangita og damang aron ilang ipaaway aron pustahan sa ilang mga kauban. (Orlando B. Dinoy)