GIDALA mismo sa amahan nga si Monroe Arriesgado ang iyang anak nga lalake nga usa ka tuig ang pangedaron aron mapabakunahan sa Department of Health (DOH) 7 sa oral polio vaccine (OPV) ug measles vaccine kagahapon.
Usa lang ang anak ni Arriesgado sa liboan na nga nahatagan sa DOH 7 sa libreng bakuna batok niining mga makamatay nga sakit.
Kagahapon lang gikompirmar sa DOH 7 nga niabot na sa siyam ang patay sa tipdas.
Usa ka masuso nga babaye nga 11 ka buwan ang uwahing nakalas niining sakita.
Ang bata gikan sa dakbayan sa Sugbo, kinsa namatay tungod sa multiple organ failure gikan sa komplikasyon sa tipdas.
Mao na kini ang ikasiyam nga patay, nga naglakip sa tulo sa Cebu City; ug tagsa sa Lapu-Lapu City, Moalboal, San Francisco, isla sa Camotes; Carcar City, Pinamungajan ug Consolacion.
Matod ni Jane Michelle Raagas, nurse V sa DOH 7, nga aduna nay 898 ka mga kaso sa tipdas sa Central Visayas karong tuiga.
Nag-una gihapon ang Cebu City nga aduna’y 247 ka mga kasoa. Gisundan kini sa Lapu-Lapu City sa 50 ka kaso ug Talisay City diin 34 ang mga kaso.
Sa pagkakaron, nagpadayon ang immunization response vaccination sa DOH 7 sa nagkadaiyang parte sa rehiyon aron ilang makuha ang ilang target nga anaa nalang sa 244,091 base sa updated nga lista nila sa mga bata nga nagpangedaron og unom ka buwan hangtod 5-anyos.
Matod ni Ruff Vincent Valdevieso, nurse III ug vaccination coordinator sa DOH 7, nga nitabang ang World Health Organization (WHO) sa pag-update sa listahan.
Anaa na usab sa 35 porsyento sa ilang vaccination rate o 86,122 ka mga tawo sa labing uwahing datus kagahapon, Marso 12.
Molungtad ang pagpamakuna batok tipdas hangtod sa katapusan sa Marso diin mamahimo kining makuha sa mga health centers ug sa DOH 7 regional office.
Gibasol sa kagamhanan ang kahadlok sa publiko sa pagpabakuna human sa kontrobersiya sa Dengvaxia, bakuna batok sa dengue fever.
Nakaplagan sa mga pagtuon nga mas kuyaw ang bata nga maigo sa grabeng dengue kon nabakunahan kini nga wa pa masakit niini.
Tungod sa kontrobersiya, giundang sa kagamhanan ang immunization program nga gigastuhan og binilyon ka pesos nga pundo. (HBL)