UNSAY buot ipasabot ni PRRD sa dihang misulti siya nga dili niya pirmahan ang 3.8 trillion budget para karong tuiga 2019 kon makita niya nga kini illegal?
Simple lang.
I-veto niya ang maong budget proposal og magpadayon ang gitawag og reenacted budget karong tuiga.
Unsay mahitabo sa budget proposal?
Ibalik kini sa kongreso og repasohon na sab kini.
Kon makuha ang 2/3 vote sa Senado og sa Ubos Balay-Balaoranan, mamahimong balaod ang maong budget proposal bisan pa sa pag-veto sa presidente.
Mahimo ba kini?
* * *
Morag lisod mahitabo kini.
Ngano man?
Tungod kay mismo si Senate President Tito Sotto misulti nga dili siya mopirma sa maong budget proposal nga matod pa, gikuso-kuso sa Ubos Balay Balaoranan.
Og dili molusot sa senado ang maong budget proposal, kay dili mopirma si Sotto, dili na kini moabot pa sa lamesa sa presidente.
Tablaw pay namatay na ang maong budget proposal.
* * *
Unsa may gipasabot sa presidente nga illegal nga dokumento?
Illegal kay wa mosubay sa balaod.
Unsay gisulti sa balaod mahitungod sa paghimo og budget proposal?
Dili na pwede ang pork barrel o ang eskadaloso nga PDAF nga iapil sa budget.
Nagpasabot ba kini nga kon makita sa presidente nga gimaniubra sa mga kongresista ang pipila ka bilyon ka pesos alang sa gitawag og budget insertion ngadto sa mga pinili nga mga kongresista nga kaalyado ni Speaker GMA, dili na kini niya pirmahan?
* * *
Mao kini nakalisod niini.
Kwarta sa katawhan ang gihisgotan. Dili mahimo og i-moryo-moryo lang ang paghimo sa national budget.
Kinahanglan nga ayohon kini og gama aron kadtong mga departamento nga angay hatagan og dako nga budget makadawat gyod sa maong dako nga budget.
Pananglitan, mahimo nga moagi ang mga tawo sa mga karsada nga guba, bisan tuod dili nindot ang dagan sa sakyanan, pwede lang gihapon kini again.
Apan kon way makaon nga mapalit o mahal na kaayo ang presyo niini, bisan sa usa ka adlaw lang kini mahitabo, segurado gayod nga moreklamo na ang mga tawo niini.
Posible pa gani nga mag-riot ang mga tawo aron lang makakita og pagkaon.
Buot ipasabot, angay masabtan sa mga magbabalaod nga mas importante ang pagkaon kay sa paghimo o pag-ayo og karsada.
* * *
Sa gihimo nga joint meeting sa RDC ug RPOC kaniadtong miaging Lunes, mihatag og update si PNP regional director Debold Sinas mahitungod sa sitwasyon sa kampanya sa druga, ingon man ang kabahin sa umaabot nga piniliay karong bulan sa Mayo.
Matod pa niya, nagpadayon ang pagkuyanap sa patigayon sa ginadiling druga sa Central Visayas og nahibaw-an na sa PNP ang mga nalambigit niini.
Lisod lang ang pagdakop sa mga nalambigit.
Ngano man?
Kinahanglan nga masakpan sa akto nga naghimo sila sa maong krimen. Dili mahimo nga dakpon sila tungod sa pagduda lang, kinahanglan dunay bug-at nga ebidensiya.
Mao kini hinungdan nga igo lang sila sa pag-monitor sa mga nalambigit og magpa-abot sa hustong higayon nga mahimo na kini sila nga dakpon.
Kon dili mosipyat kining mga tawhana, way mahimo ang PNP.
* * *
Matod pa usab ni ASec Judge Echiverrie sa DILG nga pasakaan nila og kaso nga criminal ug administratibo ang mga opisyal nga nahilambigit sa patigayon sa ginadiling druga sa dili pa kini isibya sa presidente.
Sa ingon nga paagi, dili sila makareklamo nga gipakaulawan lang sila.
Nindot kini.
Apan, kanus-a kaha kini mahitabo?
Sa wala pa ang piniliay o human na sa piniliay?
Nindot unta og buhaton kini sa presidente sa wala pa ang piniliay.