LAING centenarian na usab ang gidalitan ug usa ka “birthday blowout” sa kagamhanan sa dakbayan sa Lapu-Lapu kagahapong adlawa, Marso 12.
Niining higayona usa ka 100-anyos nga lola na usab sa Sitio Lasang Soong, Barangay Mactan ang gisuprisa sa kagamhanan atol sa iyang adlawng natawhan.
Ang 100-anyos nga lola nailhang si Margarita Atillo kinsa tuig 1980 pa nga nanimuyo sa dakbayan.
Si Atillo gidalitan ug cake ingon man mga lamiang pagkaon sa kagamhanan sa dakbayan nga gisaw-an usab sa mga kabanay ug mga silingan.
Personal usab nga gitunol ni Lapu-Lapu City Mayor Paz Radaza ang P100,000 nga tseke gikan sa kagamhanan isip Centenarian Cash Award ngadto kang Atillo.
Ang mayor nahimuot sa kadaghan diay nga mga centenarian sa dakbayan.
Sa miaging semana usa ka 102-anyos nga si Maximina Quintero nga taga Barangay Pusok ang gidalitan usab sa kagamhanan sa dakbayan ug usa ka birthday blowout.
“Mga long life gyud ni ang mga taga Lapu-Lapu posible sa ilang mga eating habits and most probably ang pagsilbi usab sa ilang pamilya sa ilaha mao nay nakapataas sa ilang kinabuhi,” matod ni Radaza.
Si Erlinda ug Herminia Atillo, ang duha sa mga anak ni Margarita nga buhi pa sa pagkakaron, mibutyag nga ang sekreto ra gayud sa ilang inahan mao ang dili gayud kaayo pagkaon ug karne.
Utan ra matod pa ang kan-on niini ug lakip usab sila nga mga anak ang gipadako nga utan ra usab ang kan-on kada adlaw.
Ilang gibutyag nga kaniadto pang gagmay sila ma adlawng Dominggo ra gayud sila makakaon ug karne apan isagol gihapon kini sa mga utan.
Dili usab matod pa kini ganahan ug adunay asin o bitsin ang karne kun ugaling mokaon kini.
Lumad nga taga lungsod sa Borbon ang kaliwat sa banayng Atillo sa wala pa nibalhin ug puyo sa dakbayan.
Ka usa ra usab matod pa nadangat sa tambalanan si Lola Margarita ug karon ra usab kini nga edaran na.
Dili na hinuon kini kaayo makaklaro apan padayon pang makadungog kun hunghungan sa mga apo ug anak.
Magpa-agak pa usab kini aron maglakaw-lakaw sa kasilinganan.
Ang anak niining si Erlinda, napangedaron na karon ug 67-anyos, samtang si Herminia, 80-anyos na usab.
“Kana sir mintras buhi pa si Mama kanang kwartaha ako gyud nang tagoan. I-bangko gyud na kay si Mama man gud mokaon pa siya, daghan pa siyang kuan pananglitan magkasakit siya unsa pay mahitabo, anha namo kuhaon sir,” pagpasabot ni Erlinda sa pangutana kun unsaon nila ang salaping nadawat gikan sa kagamhanan sa dakbayan sa Lapu-Lapu.
Si Margarita adunay walo ka mga anak apan unom na lang buhi niini sa pagkakaron ug moabot sa dul-an 80 ka mga apo ug apo sa tuhod.
Nabiyuda siya niadtong tuig 1975.