USA ka 40-anyos nga giilang drug queen ang nasikop uban sa iyang ka kakunsabo human kini makuhai og kapin sa tunga sa milyon nga balor sa gidiling drugas kagahapon sa alas 2:10 sa kadlawon didto sa Brgy. Guinsay, siyudad sa Danao.
Si Marbella Lapiña, 40, minyo, nagpuyo sa Guinsay, ang gipusasan sa mga tinugyanan sa balaod uban sa iyang kakunsabo nga si Tomas, Ramonida, 42, ulitawo, taga Brgy. Suba, dakbayan sa Danao.
Si SPO1 Arnold Labine, sa Danao Police Station, nagkanayon nga si Lapiña ug Ramonida naigo sa ilang buy bust operation human nila paliti og usa ka dakong bulto sa shabu nga nagkantidad og P50,000 gamit ang boodle money.
Matod pa nga nakuha sa possession sa mga dinakpan ang usa ka medium nga putos sa shabu nga motimbang sa 75 gramos.
Subay niini, laing duha sab ang nasikop sa buy bust operation sa kapulisan kagahapon sa alas 4:35 sa kadlawon sa Brgy. Maslogood, dakbayan sa Danao.
Gitanggong sa mga tinugyanan sa balaod sila si Raymart Calzada, 27, ulitawo, taga Brgy. Guinsay, ug Juanitof Herrera, 42, ulitawo, taga Brgy Nangka, Consolacion.
Nakuha gikan sa duha ang 55 gramos nga shabu nga mobalor og P374 mil, ug 357 revolber nga dunay tulo ka buhing bala. (GPL)