SA TUNGA-tunga sa tuig 2022, aduna nay Bus Rapid Transit (BRT) sa dakbayan sa Sugbo.
Kini ang gibutyag ni Nigel Paul Villarete, project manager sa BRT, kinsa nihulagway nga naghinayhinay na og irog ang preparasyon sa P16 bilyones nga proyekto.
Matod pa ni Villarete nga aduna nay natudlo nga technical support consultants ang Department of Transportation (DoTr) ug uban pang gikinahanglan kansang buhatan nahimutang sa Cebu Business Park (CBD).
Gipahibawo ni Villarete nga adunay kausaban sa detailed engineering design sanglit giapil sa rota sa package A ang IT Park inay adto ra kutob sa CBD.
Ang package A manukad gikan sa South Road Properties (SRP) paingon sa N.Bacalso, Osmeña boulevard, Escario street lahos sa Ayala paingon sa IT Park.
Matod pa ni Villarete nga mahuman ang detailed engineering design (DED) nga maoy basehan sa proyekto labing dugay Pebrero 2020.
Gikatakdang mahuman ang study sa paghimo nga six-lane sa dalan Escario sa mosunod nga tulo ka mga buwan.
Human makumpleto sa DOTr ang tanang gikinahanglan, gitug-an ni Villarete nga andamon na usab ang mga bid document aron isunod ang public bidding nga mahuman unom ngadto sa walo ka buwan.
Siya nanghinaot nga matapos lang sulod sa 120 ka adlaw.
Iyang napanglantawan nga adunay tulo ka bidding nga pagahimuon alang sa package A, B ug C.
Ang BRT adto magsugod sa barangay Bulacao sa south district.
Kini molahos sa Brgy. Talamban sa north district.
BUS SUPPLIER
Iyang gihulagway nga isunod unya ang paghisgot kon si kinsa ang mo-supply sa mga bus nga gamiton, ang gobyerno ba o ang private sector.
Nagkinahanglan na usab kini og taas nga panahon para pag-manufacture sa klase sa bus nga gamiton. Dugang ni Villarete nga kon operational na ang package A, ang mga pasahero nga molahos sa Talamban gikan sa IT Park ibalhin og laing bus o sakyanan.
Gibanabana ni Villarete nga kon masunod ang mga plano, sa di pa mointra ang2024, kumpleto na ang rota sa BRT gikan sa Bulacao paingon sa Talamban.