SASAMUL na na ning dulum ing sala
at ing silim darampulan nong anting sabo ring malulut a kulumanas
ding sablang makabusal
king panimanman mu.
laganas maging kapitangan ning abu. makapanikal ing paynawang simpal
ning pamikatagun.
dapot ita pin ata ing sumpa
ning pebustang penandit.
lalangi na’t babangnas ing panglasa
king kasalungsungan
at papait na
ing ketubasang milabas
agnan ning pangaburu
ning arapang payntungul.
mesaul la ring batu
pauli ning ita
ing tungkulan da’t palad.
o mekad ika ing migkyapus
king kabilyan da.
mamit-amit pamo ing agus lwa
ning panyulat ku
lupa ring mata ning mebalu
king aldo ning kasal na.
gawan na ka mang pipi
at e pa mekagyu
ing pamanglumpu na keka.
ing pamaglakbe metung a bage
magkalub kasdanan
king metung a kulung
king sarili nang gewang maglage.
ing aldo agyang ya naman
ing aslagan na…
maliwa ya albugan nung makarayu ka.
ding bigang takap king lupa na
ila naman ding tatakap king isip ku
bang’ting upayang e da ka paniglon
at mikasangkan na kang matibe
bang asakwil mu ku
king panimanman mung lilu.
king pamalsinta mung lakwas
king sarili mu.
tatakbang la ring bitis
malalakwan ya ing katawan.
titilo ya ing isip,
mamanyud ya ing malit.
gagapang ya ing kulubasa,
malalakwan ya bunga.
ninu ing limus
king pulubi ning panaun?
parusa kaya ini
king e pamipaulaga
king balang kurap,
balang inawang saldak,
balang taluntun ning daya
karing uyat a magpakabug
king salung kasna na
king pangakalubkub
king lambis
o apis…
o dit mu mang suglap.
at kawa king e na pamanakit
king kekang siwala
o pamanamdam king kekang aske
aplusan ning pamaginakit
ning metung mebating karapatan
king kulam o kalam
ning legwan mung megpaluse kaku.
kaylangan ku walang ilikas
ing gewa ku karing mengakutud a impun
karing kandungan da
ring pepatiktikan
at pepalanging laru.
o upaya ning pamagbayu…
alipan mu ku anti
king pangayalipan ku keka.
dapot ginapus mu ku e king talikala
nung e king kekang mapamanding pusu
a misabit laksang kaban
karing mikangatbang paglakbang
o paglakbe.
binulus mu ku ba’mung dakpan pasibayu eku pa man apilasa ing katimawan.
belikdan ku
ing maslag mung lupang tambing miglulam inyang mikawani kata
at mipampan na ka
karing delanan kung dalig at tulus.
ngeni mabye pa
ing suglap mung ating pamigaganaka dapot alang akarapat a pamananggap. pamanyuku king pamikawani ta.
ngeni na ing tipan ning napun.
at ing singla mung diwa
sukat mu neng atbusan
karing masaklo matang peparam.
ing patubu yang magkalub punan keka bang lakwas kang sakim bang lakwas meng pagimbutan ing sarili mung kablas karing sablang kakablas.
disnan da na kang uman me ing sarili mu king danum ning pitak
a laram ning salamin king lino…
at kakaul king sarili mung alino
makapakat karing sablang bage
durugpan na niti.
e na bage ing dirine ning asu.
ing aldo mamanlag ya’t lumbug na naman dapot aliwa ing lupa mung tuki-tuki
king panimanman kung kisna kaniti.
king panalala
ding saligakgak mung kakablas
anting dalit king isip ku
at magpaterak karing samut-samut
a panamdam ku.
king munag maglakbe kang pasibayu
lakwan la ring bayung bakas
karing gasgas a kekang tuklwan.
at ding kasalang mu
pangilagan da la’t dapugan deti
dapot kanaku lang tangalan
o mekad ka’kung samba’t uman
anting bayung bukadkad a sampaga.
mmmmmmmm…
ay…mikandayu kata pa.
malambat pa ing pamanuli mu
at pamikit tang pasibayu.
kalingwan da ka pamu
kabang pigaganakan da ka.
wa, mekad.
- impunsigwa,
ka-9 ning ka-2ng bulan,
ka-10 ning ka-2ng libungbanwa
***
Nung nanu man ing mali king Kapisik ayni, agkatan da kayung paralang sisti o pamitulid. Malyari kang magparalang sulat o mambag kawatasan, kapusungan, balita, munikala o sisti. Parala mu kabud o iyaus king kek’ong talasuyung talasulat king text o cp: 0919-6940-224 o king email: garciakragi@yahoo.com. Ipisik me, abe!!!