KAPIN sa P8 million sa gituohang illegal drugs ang nasakmit sa kapulisan sa siyudad sa Sugbo sa managlahing anti-drug operations sa Martes sa gabii, Marso 12, ug Miyerkules sa tungang gabii, Marso 13
Unang nasikop sa mga pulis sa Mambaling police station, alas 11 sa gabii, Marso 12, mao si Jonmarc Filipino Cardenas, 19, taga Block 4, Barangay Sawang Calero, dakbayan sa Sugbo.
Nakuhaan siya og pito ka dagkong putos sa shabu nga motimbang og 200 grams nga mobalor og P 1,360,000.
Sa pagka alas 12:50 sa kaadlawon sa Marso 13, nakasakmit usab ang Talamban police station og kapin sa P 7 milyunes nga kantidad sa shabu gikan sa usa ka babaye atol sa buy-bust sa sitio Banilad, barangay Banilad ning syudad.
Ang suspek giila nga si Vanessa "Van-Van" Lauron, 24, taga Sitio Ponce 1, Brgy. Carreta, siyudad sa Sugbo.
Nakuha kaniya ang kapin sa usa ka kilong shabu nga mobalor og P 7, 031,200.
Ang buy-bust pinangulohan ni P/Sr. Insp. Elisandro Quijano human mamatikdi ang ilegal nga negosyo ni Lauron.
Matod ni Sr. Insp. Quijano nga gikan sa Liloan ang supply sa drugas ni Vanessa apan wala siya makaila sanglit gipaagi lang, matod pa, sa cellular phone ang ilang komunikasyon.
“Mahulog nga distributor siya sa drugas..” matod ni Quijano.
Wala malakip sa watch list sa Talamban police station ang dinakpan apan tungod sa kadaghan sa shabu nga nakuha sa iyang posisyon matawag na kini og high value target.
Nasikop usab ang usa ka 19 anyos nga taga Sawang Calero atol sa buy bust sa Labangon police station nga gipangulohan sa ilang hepe nga si Chief Insp. Keith Andaya.
Ang nadakpan giilang mao si Josylindro Getaruelas sa C. Padilla St., Barangay S an Nicolas Proper, siyudad sa Sugbo.
Nakuha gikan kang Getaruelas ang 25 gramos nga shabu nga mobalor og P170,000 base sa Dangerous Drugs Board (DDB) value.