UNOM sa 10 ka mga tawo nga positibo sa HIV nakuha kini tungod sa pakighilawas sa parehong lalake.
Mao kini ang labing uwahi nga datus sa Department of Health (DOH) 7 sa nagpabilin nga nagkataas nga kaso sa HIV sa Central Visayas (CV).
Niabot na usab sa 42 ka mga tawo ang mataptan niining makamatay nga sakit matag adlaw base sa datus Enero ning tuiga lukop nasod.
Sumatotal aduna’y natala nga 977 ka mga kaso sa HIV sa 2018 alang sa Central Visayas ug nagpabilin nga nag-una ang Cebu Province nga aduna’y 827 ka mga kaso, gisundan kini sa Bohol sa 87 ka kaso ug Negros Oriental diin 57 ka kaso ang natala.
Sa tuig 2018 nag-una gihapon ang lalake nga nakighilawas sa susamang lalake diin adunay 464 kini ka mga kaso.
Samtang ang age group nga 25-34 mao ang labing daghan nga aduna’y kaso diin niabot kini sa 475 sa tuig 2018.
Usa usab ang patay sa buwan sa December 2018 diin kini ang ika-39 sa mga namatay sa tuig 2018.
Tibuok nasod, anaa sa Ikaupat ang CV sa adunay daghang diagnosed sa HIV diin nag-una gihapon ang NCR, gisundan sa Region 4A ug 3.
Nasuta usab nga anaa nalang sa ikaduha ang injecting drug use sa hinungdan nga mataptan sa HIV.
Matod ni Dr. Van Phillip Baton, ang coordinator sa HIV/AIDS program sa DOH 7, usa ang active screening nga usa sa rason nga daghan na ang natalang diagnosed sa HIV.
Sulod usab sa tulo ka tuig natala ang labing taas nga daghang natala nga kaso sa HIV niadtong Enero lukop nasod.
Aduna’y 1,249 ka mga kaso ang natala Enero ning tuiga lukop nasod.
Sa pagkakaron, wala pay tino nga tambal kini.