LALAKI nga nakuhaan og footage sa closed-circuit television (CCTV), atol sa iyang pagpangawat og motorsiklo, sa Barangay Paknaan, dakbayan sa Mandaue, nasikop duha ka adlaw human sa pagpangawat niini.
Sa parte sa kuha sa CCTV footage nakuhaan ang lalaki nga nakaputi og T-shirt ang yano nga naglakaw padung sa motorsiklo nga naka-park sa atubangan sa usa ka gasoline station.
Yano ra usab niini gisakyan ug gimaneho palayo ang motorsiklo nga color orange.
Nahitabo kini pasado alas 2 Biyernes sa hapon, Marso 8, sa Zone Tangkong, Barangay Paknaan, sa maong dakbayan.
Apan nasuta nga ang maong lalaki dili maoy tag-iya sa motor.
Ang tag-iya nga si Ellezar Servano ang nidangop sa Basak Police Station og nagpa-blotter.
Gitug-an sa biktima nga ang motor bag-o lang napalit, gani ‘for registration’ pa ang plate number niini.
Hinuon swerte nalang kay ang pagpangawat ang nakuhaan sa CCTV sa barangay nga gipang-monitar sa nagkadaiyang dapit sa barangay ug klaro ang panagway sa suspetsado.
Matud ni Police Major Ramil Morpos, ang hepe sa Basak Police Station, nga niadtong Dominggo, Marso 10 sa alas 9 sa buntag, adunay nadawat nga report, kalabot sa armado nga tawo sa Zone Sayote sa Paknaan.
Atol sa ilang pagresponde, nasikop ang usa ka Cirilo Cuyno, 40 anyos, lumad nga taga Pitogo, lalawigan sa Bohol.
Giingon nga wala pa kini semana sa Barangay Paknaan.
Nakuha gikan kaniya ang usa ka 38 revolver nga armas, lima ka pakete sa gituohan nga shabu ug usa ka bag, nga anaa didto ang mga gipang-suot atol sa iyang pagpangawat sa motorsiklo.
Na-recover ang motorsiklo nga gikawat diha na sa usa ka motel sa siyudad sa Mandaue.
Gisusi karon kon aduna ba kini kalambigitan sa giingon nga grupo sa mga kuratong nga maoy nakalinya sa pagpanulis, sama nalang niadtong nasikop sayo ning bulana nga giila nga notadong kawatan nga si Gerry Erana.
Ug kon si Cuyno ba ang responsable sa pagpang-snatch o pangawat sa ubang motorsiklo sa syudad sa Mandaue o silingan nga lugar.
Nasuta nga si Cuyno, aduna nay kaso sa robbery sa dakbayan sa Sugbo apan nakapyansa lang.
Usa sa ilang gisusi, kon modus ba usab nila ang pagpangawat og motorsiklo nga posible magamit diha sa motor-riding-suspect nga insidente sa pagpamusil sa dakbayan.
“Ato bitaw ni gitan-aw pa ang background ani nga dinakpan, kay basin sakop na ni sa grupo sa Kuratong nga maoy moigo sa parte sa kawat, nga mo-boils down ra gihapon sa drugas. Ato giawhag ang mga nawad-an og motorsiklo sa pagdangop sa Basak Police Station, pag-ila ug alang sa pagpasaka og kaso,” gitug-an ni Police Colonel Julian Entoma, ang director sa Mandaue City Police Office. (FMD)