WALA pay gihuptan nga ebedensya ang kapulisan sa probinsya sa Sugbo nga ang naghimo sa pagpatay sa usa ka mag-uuma sa bukirang barangay sa Danao nga gi panitan usab ang dagway konektado sa nahitabo sa syudad sa Lapu-lapu.
Matod ni Senior Superintendent Manuel Abrugena nga sa pagkakaron miabag na sila sa imbestigasyon sa Lapu-lapu City Police Office (LLCPO) alang sa pagpangita sa responsabli sa kamatayon ni Christine Lee Silawan.
Wala usab nila wad-a ang posibilidad nga ang naghimo sa Danao mao ra usab ang sa syudad sa Lapu-lapu tungod kay susama man kinig estilo sa pagpatay.
Dili pa usab makompirmar ni Abrugena nga mga sakop sa usa ka kulto ang mag suong Bueno nga maoy nagpatay ni Trinidad Roble Batucan sa sitio Agutayan, Barangay Lawaan sa syudad sa Danao.
Pulos tabi tabi lang sa mga residente sa bukid nga ang gihimo sa magsuong Bueno ritwal sa ilang grupo nga kulto diin ang parte sa lawas nga ilang gihiwa ila ra usab nga kan-on.
“Yes sir, ito po yung kumakalat na balita but we still have to confirm these and allegedly quote “after dismembering yung mga muscles nang victims kino consume nila,” matod ni Abrugena.
Una kining insidente nga nasugatan ni Abrugena diin ang ilang gipatay ila pang gipanitan ang nawong hangtod sa dughan niini.
Napatay sa engkwentro niadtong Enero 13 ang magsuon nga silang Junrey ug Juvy Bueno apan naka ikyas ang usa pa nila ka igsuon nga si Jonas.
Si Jonas gitumbok nga naka dala pa kinig KG9 nga armas sa iyang pag ikyas nga giingong anaa pa sa bukirang barangay sa lungsod sa Carmen.
Gimandoan ni Abrugena ang hepe sa Danao City Police Station nga si Superintendent Maribel Getigan nga mohimog imbestigasyon sa bukirang barangay kung aduna bay laing membro ang magsuong Bueno.
Ang magsuong Bueno matod pa gikahadlokan sa mga molupyo sa mga bukirang barangay sa Danao tungod sa ilang kalambigitan sa pagpamatay sa mga mag-uuma.