“Klaro ang mando sa SEC sa Kapa nga undangon ang ilang operation kay ilegal apan padayon sab ang pag-awhag sa Kapa sa katawhan kay dili kuno sila ilegal.”
SA PADAYON nga kaguliyang kalabot sa mga investment nga kuno donation sa mga nagpamiyembro sa Kapa Community Ministry International ug sa mga kontra sa maong kalihukan, ubay-ubay na ang nabalaka unsa kaha gyud ang sangputan sa ilang kuwarta ugaling mahunong ang patigayon sa Kapa.
Gi-deny sa Regional Trial Court sa General Santos City ang gipasaka sa Kapa nga temporary restraining order (TRO) aron pugngan ang cease and desist order nga gipagawas sa Securities and Exchange Commission nga undangon sa Kapa ang pagpangolekta og investment gikan sa katawhan diin ang katawhan modawat og 30 porsiyento nga tubo matag bulan nga ilang gitawag nga LOVE gift.
Klaro ang mando sa SEC sa Kapa nga undangon ang ilang operation kay ilegal apan padayon sab ang pag-awhag sa Kapa sa katawhan kay dili kuno sila ilegal.
Daghang katarungan ang ilang ginapasiatab ug ang pagpasigarbo nga dili mahitabo nga paundangon sila tungod sa ilang connection sa mga inilang personalidad.
Dunay mga miyembro nga nakasapi ang nag-ingon nga sayod silang daan nga donasyon ang ilang gihimo ug dili dapat manghilabot ang uban labi nga wala may nireklamo sa pagpadagan sa ilang kuwarta sa ministry.
Kon tinuod nga ministry ang tumong, unsa man ang doktrina nga inyong ginatudlo sa katawhan? Unsang fundamental beliefs ang haligi sa organisasyon nga 30 porsiyento man nga interest ang hinungdan nganong minunot ang katawhan?
Mituo ang katawhan nga kuno mabalik ra ang ilang donasyon kon mohawaha o moundang na sila kay mao kini ang pasalig sa mga namuno sa Kapa.
Usa kini ka saad nga wala pay kasegurohan kay kinsa man ang mobutang sa ilang kuwarta kon sa ilang pagpamiyembro pa lang moingon mo nga walay seguro mabalik ba ang ilang puhonan?
Sa pagpadayon sa inyong kalihukan nagpakita lang nga supingko ang mga lider sa Kapa kay daan na man nga sukwahi ang inyong binuhatan sa rehistrasyon sa inyong organisasyon.
Sa akong yano nga panglantaw, daw misalom sa lubog nga lim-aw ang mga mibubo sa ilang kuwarta kay sayod mo daan unsay inyong gipirmahan, mga donor mo, dili investor.