Usa ka 31 anyos nga babaye naluwas sa pagsuway og lugos kaniya dihang naghubo sa iyang brief ang suspek, alas 3:34 sa kaadlawon sa Huwebes, Abril 25, 2024, sa Sitio Aroma, Brgy. Dumlog, dakbayan sa Toledo.

Si Ana (dili tinuod ngan), 31, dunay kapuyo, nangayo og panabang sa kapulisan human nakalingkawas sa mga kamot sa suspek.

Nasikop sa kapulisan giila nga si Joselito Pastilyo Rubin, 41, minyo, mananagat, silingan.

Si Police Chief Master Sgt. Joy Enerio, hepe sa Women and Children Protection Desk (WCPD) sa Toledo City Police Station nga nahinabi sa Superbalita Cebu sa Huwebes, nagkanayon nga si Ana natulog nga nag-inusara sa ilang panimalay.

Asoy niya ngadto sa kapulisan nga wala ang iyang kapuyo sanglit tua kini sa trabaho.

Giguba sa suspek ang lock sa pultahan sa ilang balay hinungdan nakasulod kini apan, matod ni Ana, nakamata siya dihang gitiunan og kutsilyo sa suspek.

“Gitiunan siya sa kitchen knife. Naghikap sa iyang lawas unya gihuboan sa panty. Naghinamhinam na guro tong suspek, naghubo dayon sa iyang brief,” matod ni Enerio.

Apan sa paghubo sa suspek sa iyang brief, nakahigayon ang biktima sa pagdagan ug pagsinggit sa pagpangayo og panabang.

Naratol ang suspek nga nagdali’g dagan ug wala na makatarong sa pagsul-ob sa iyang purol sa paggawas sa balay.

Nanggawas ang mga silingan apan nakatago ang suspek hinungdan nga wala nila makit-i.

Mga alas 8:00 sa buntag, nadakpan ang suspek sa hot pursuit sa kapulisan.

Matod ni Enerio nga hitsuraan ang biktima ug wala pay anak.

Nagtuo ang kapulisan nga ang suspek naibog kang Ana ug nangita unta og insakto nga panahon nga malugos kini.

“Wala daw siya kasabot kon nganong nabuhat to niya. Libog siya nganong naa didto,” sumala ni Enerio base sa asoy sa suspek sa pag-imbestigar sa kapulisan.

Apan gipasabot ni Enerio nga alibi lang sa suspek nga wala siya kahibalo kon nganong nahimo ang krimen kay wala gani kini magtarong sa pagtubag sa ilang mga pangutana.

“Magsige na lang sa pagduko, magpanglingo,” dason ni Enerio.

Kasong attempted rape giandam sa kapulisan batok sa suspek. / GPL

Piniriso naghikog

Trending

Just in

Branded Content