GIHIMAKAK sa Philippine Drug Enforcement Agency (PDEA) nga ang impormasyon nga gibasihan sa narcolist gikan sa mga intercepted phone conversations sa mga gobyernong langyaw sama sa Estados Unidos, Israel, China ug Russia.
Si PDEA Director General Aaron Aquino niingon nga ang ilang tinubdan sa narcolist mao ang mga ahensiya sa lokal nga kagamhanan, sa ilang mga sakop mismo sa PDEA, ug di gikan sa ubang mga nasud.
Daghang nangutana kon nganong wa pasakahi og kiha ang mga politiko nga naapil sa narcolist. Kon tinuod nga ang impormasyon gikan sa wiretapping sa ubang mga nasud, di kini magamit nga ebidensiya sa atong mga hukmanan.
Ang Section 3, Article III (Bill of Rights), 1987 Constitution, nagkanayon, “(1) The privacy of communication and correspondence shall be inviolable except upon lawful order of the court, or when public safety or order requires otherwise, as prescribed by law. (2) Any evidence obtained in violation of this or the preceding section shall be inadmissible for any purpose in any proceeding.”
Mao kini ang gibasihan sa Republic Act No. 4200, ang Anti-Wiretapping Law. Ang Section 1 niini nagkanayon, “It shall be unlawful for any person, not being authorized by all the parties to any private communication or spoken word, to tap any wire or cable, or by using any other device or arrangement, to secretly overhear, intercept, or record such communication or spoken word by using a device commonly known as a dictaphone or dictagraph or walkie-talkie or tape recorder, or however otherwise described.”
Illegal usab ang paghupot sa bisan unsang recording, kompleto ug kabahin lang, nga gikan sa wiretapping. Illegal usab ang pagsabwag ug pagpadungog niini ngadto sa ubang mga tawo. Di usab kini magamit nga ebidensiya sa bisan unsang kasong sibil ug kriminal.
Ang makonbikto niini mabilanggo sa di momenos sa unom ka buwan ug di molabaw sa unom ka tuig. Kon opisyal sa gobyerno, dunay accessory penalty nga perpetual absolute disqualification from public office.
Gitugotan lang ang wiretapping ubos sa sinuwat nga mando sa hukmanan kon naglambigit kini sa krimen nga treason, espionage, provoking war and disloyalty panahon sa gubat, piracy, mutiny in the high seas, rebellion, conspiracy and proposal to commit rebellion, inciting to rebellion, sedition, conspiracy to commit sedition, inciting to sedition, kidnapping, kalapasan sa Commonwealth Act No. 616 nga nagsilot sa espionage ug ubang kalapasan batok sa nasudnong seguridad.
Wa pay balaod nga nagtugot sa wiretapping sa mga krimen nga kudeta, money laundering ug sa illegal nga drugas. (edbarrita@gmail.com)