MAGNEGUSYO na lang kuno si Sen. Manny Villar kon gusto pa siya nga mosamot pagkadato.
Ang tuyo gyud niya sa pagdagan sa pagka presidente mao ang pagtabang sa katawhan.
Ug di niya bawi-on kining binilyon nga iyang gigasto karon aron pili-on sa katawhang Pilipino sa umaabot Mayo 10, 2010.
Tulo lang kini sa mga mensahe ni Villar nga mag-proclamation rally karon sa Sugbo.
Base lang sa pagsaka karon sa survey ratings ni Villar, makaingon kita nga daghan gyud ang nituo sa maong mga mensahe nga gibandera sa daghan kaayong mga komersyal sa telebisyon.
Apan di ako apil niining dakong porsyento nga nadala sa mga atik ni Villar.
SAYOP
Nakaingon ko nga atik kining linya nga magnegusyante kon gusto magpadato ug di na lang modagan.
Sukad pa sa wa pa ang martial law, nanaway na ang mga Walhon sa giingong bureaucrat capitalism.
Sa simpleng pagkasulti, mao kini ang paggamit sa pwesto sa kagamhanan isip negusyo.
Sa paglabay sa katuigan, wa mawagtang kining paggamit sa gahom sa pangagamhanan aron mosamot sa pagka adunahan.
Kon gusto madato diha sa kagamhanan, way makalupig kon mag-presidente.
Nakita nato kini nga nahitabo sa panahon ni Marcos.
Nahitabo sab kini sa siyam ka tuig ubos ni Presidente Gloria Macapagal-Arroyo.
Karong magpresidente si Villar ginamit ang paglabay sa pipila ka-bilyon, motuo ba kita nga di kini kapital nga gibubo sa usa ka burukratang kapitalista?
Naa ra gyud kini sa kada usa kanato kon madala ba sa maong pamahayag ni Villar. Apan kon ako ang pangutan-on, di gyud ko motuo.
DI BAWI-ON?
Mangutana ko karon sa atong mga magbabasa kon si kinsa ang motuo nga di bawi-on ug paginansyahan?
Kon sa atong tan-aw siguradong bawi-on ni Villar ang maong gasto, sunod pangutana mao nga unsaon kaha niya sulod lang sa unom ka tuig.
Mahimo lang nato panaminan ang isyo kabahin sa budget insertion ug C5 aron makakuha og ideya kita kon unsaon.
Kon posible ang insertion ug C5 sa panahon nga senador si Villar, unsa kaha ang mahitabo kon presidente na siya?
MGA WALHON
Hinuon, makaingon ko nga dunay dakong grupo nga di motuo nga usa ka burukratang kapitalista kini si Villar.
Ug mao kini ang mga Walhon nga gipangulohan nilang Satur Ocampo ug Liza Maza nga ningdagan alang sa pagka senador ubos sa bandera sa Partido Nacionalista.
Ang mga Walhon nga maoy nag-isa niining isyo nga bureacrat capitalism kuyog karon ni Villar sa ilang kawsa aron “maahon ang masa galing sa kahirapan.”
LOREN
Si Sen. Loren Legarda nga wa maigo og isyo nga kurapsyon mao sab ang paris karon ni Villar.
Makaingon kita nga duna sab gyuy mga tawo nga ligdong nga nituo kang Villar.
Buot ipasabot, daghan ang motuo kaniya ug makita nato kini sa kadaghanon sa motambong sa ilang rali unya.
Pwera lang hinuon sa linibo nga gusto lang makita si Wowowee Willy Revillame.
Di lang nato apilon ang endorsement ni Dolphy nga mao ang “Comedy King” sa Pilipinas kay di baya kini usa ka komedya.
MGA GARCIA
Sa laing bahin, gipangulitawhan karon sa kampo ni Villar ang Kugi Uswag Sugbo (Kusug) nga gipangulohan ni kanhi mayor Alvin Garcia.
Nagpasabot kini nga alang sa mga Nacionalista, usa ka dakong pwersa kining kampo ni Alvin nga nagpapili karon sa pagka mayor.
Alang kanako, ang 2010 mao na ang panahon alang kang Alvin Garcia ug iyang mga kaubanan.
Nakaingon ko niini kay di na man si Mayor Tomas Osmeña ang kaatbang ni Alvin.
Ug mao ra kini ang kaatbang nga nagsigi lang sa paghilom atubangan sa mga kontrobersyal nga mga pamahayag sa iyang bosing nga si Tomas Osmeña.
Unsaon man sab kay kon motingog si Mike, kuyaw man nga sukwahi sa kang Tomas ang iyang mga panahom. Masuko unya ang bosing.
Apan si Alvin dugay na nga wa magpagawong ug nagpakitag lig-on nga baruganan kon itandi kang Mike Rama.