GIPAIMBESTIGAR sa mga kadagkuan sa Cebu City Police Office (CCPO) si PO2 Diosdado Pareja sa Pardo Police Precinct human wala kini moresponde sa usa ka shooting alarm kagahapon sa kaadlawon sa F. Jaca st., Tugas, Pardo bisan diha kini duol ra sa crime scene.
Namatay ang usa ka Jeoperin Merundo, taga Pasil, samtang samdan si Rommel Gealon taga brgy. Calamba. Sila mga tinun-an sa Technical Education and Skills Development Authority (Tesda) human kini gipamusil sa armadong mga tawo nga luwan sa usa ka awto nga color blue.
Matod pa sa nakasaksi nga wala gyud niresponde si PO2 Pareja bisan diha kini sa pipila ka metros sa lugar nga nahitaboan. Giingong nag-inum si Pareja uban sa iyang mga higala sa balay sa iyang higala nga babaye. Nagdala pa kini og patrol car sa pag-adto sa dapit apan gitago ug giparking sulod sa balay nga ilang giimnan.
NAMAKAK
Mobarog niini si DYSS staff Nene Cubian nga wala gyud maggunok si PO2 Pareja sa maong insidente. Kay kon nilihok pa dayon si PO2 Pareja, posibleng madakpan pa kadtong mga namusil.
Apan matod pa ni Pareja nga nahinabi sa DYSS Super Radyo nga iyang girespondihan ang maong alarma ug iyang gigukod ang mga suspetsado apan wala lang niya maabti.
Unsa may rason ni Ms. Cubian nga magtumo-tumo og estorya batok kang PO2 Pareja? Maayo gyod ning imbestigahon aron masuta kon kinsay namakak. Kay kon tinuod man kining pasangil ni Ginang Cubian, walay ayo kini si PO2 Pareja.
Mao ning klasiha sa pulis bulay-og. Diha pay patrol car, apan gitagu-an. Unsa man aduna kini siyay pagtugot sa iyang labaw nga dad-on ang patrol car? Unya nganong gitago man? Wala kaha protektahi ni PO2 Pareja ang babaye nga tag-iya sa panimalay nga iyang gi-estambayan ug gi-imnan?
MANGUROS
Sama sa panultihon nga ‘anha ra ta manguros kon ma-igo na ta sa kilat.’ Karon pa molihok ang city government sa pagpamando sa kabomberuhan sa pag-inspeksiyon sa mga karaang boarding house human masunog ang 15 ka units sa apartment sa Capitol site niadtong miaging adlaw. Upat ang nakalas sa maong insidente human ma-trap sulod sa compound.
Mo-hire usab og mga electrical engineer ang kagamhanan sa siyudad aron maoy mo-seminar sa mga opisyal sa barangay kabahin sa overloading sa kuryente nga maoy hinungdan sa sunog. Pastilan no, diin man ni niadto? Nganong karon pa man makahuna-huna ang atong mga opisyal niini? Magmatngon na lang gyod ta aron dili mabiktima sa sunog.
(bgnalzaro@gmanetwork.com)