DIAY nagpatuo nga bombero ang gidakop atol gyud sa pag -ulbo sa sunog pag Huwebes kaadlawon, Marso 14, sa Barangay Labangon, sa syudad sa Sugbo.
Ang peke nga bombero nga nagsul-ob pag uniporme sa Bureau of Fire Protection (BFP) Central Visayas mao si Randy Mañigo, 26, taga Salvador Extention, Barangay Labangon.
Matod ni Fire Chief Inspector Noel Ababon, ang Cebu City fire marshal, nga nahinabi sa Superbalita Cebu nga atol sa pag-pasirit sa tubig sa mga balay nga nasunog, nabantayan nila nga adunay lalake nga wala nila mailhi nga nag sul-ob sa uniporme sa bombero.
Apan ang naka paduda ni Ababon nga peke kini nga bombero tungod kay nag short pants lang kini ug adunay dala nga bag.
Misulod kini sa mga kabalayan ug dinhi na gisita sa mga fire volunteers kung asa siya nahisakop nga fire station.
Mitubag pa kini nga naa siya nadestino sa Labangon Sub-Fire Station apan sa gihimong pakisusi, wala silay kauban nga bombero nga Mañigo.
Dali kining gibunlot sa mga bombero sa dapit nasunogan nga bisan nag-dilaab pa ang kayo, ila kining giposasan ug gi turn-over sa Labangon Police Station.
Matod ni Ababon nga dako ang posibilidad nga mangawat ang maong suspek tungod kay nanulod kinig mga balay nga gipang abandonar sa mga tag-iya.