Substandard Christmas lights giguba

GIGUBA sa Department of Trade and Industry (DTI) ug City Price Coordinating Council (CPCC) ang mga nakumpiskang mga Christmas lights niadtong Miyerkules sa hapon, Marso 13, sulod sa Mayor's conference room.

Anaa sa P17,100 ang kantidad sa mga nakumpiskang mga Christmas lights gikan sa upat ka mga patigayon, diin duha niini nagagikan sa siyudad sa Cagayan de Oro, samtang ang laing duha gikan sa dakbayan sa Gingoog.

Ang mga gipangguba nga mga substandard nga mga Christmas lights mokabat sa P9,700, sa 97 ka buok nga Christmas lights, duha ka Mabuhay star P200, 38 ka box sa laing Christmas lights P3,800, 29 ka pack sa laing desinyo sa Christmas lights P2,900 ug laing lima nga nagkantidad og P500.

Sa pakighinabi kang Rozanne Marie San Juan, Trade and Industry specialist sa DTI, nga kumpara sa nilabay nga mga tuig nagkagamay na karong mga panahona gumikan kay nakat-on na ang katawhan ilabi na ang mga negosyante.

“Gamay na lang gyud from the previous years, daghan kaayo to before hangtod nga people are learning specially our retailers. Dili lalim, for example if you take into consideration ang isa dira nga duha ra ka piraso of Christmas lights ang corresponding ana is P17,500,” matud ni San Juan.

Gibutyag sa tsirman sa CPCC nga si Atty. Edgardo 'Egay' Uy, nga indikasiyon lamang usab nga nakat-on na ang mga negosyante gumikan kay nawala na ang ilang produkto ug puhonan dayon makabayad pa kini og multa.

“Indication kini nga naa nay awareness nga kining ibaligya dapat compliant na with regulations kay sayon raman pag detect gud kung walay ICC or kung walay Philppine Standard mark walay laing conlcusion so substandard, noncompliant,” matud usab ni Uy.

Gidugang pa niini nga walay laing buhaton ang mga negosyante gawas lamang sa pagpatuman sa bala-od aron nga dili usab sila maalkansi.

“Nawala ang ilang produkto, nawala ang ilang puhonan adto naka penalty pa gyud sila there’s no substitute to complying with regulations,” dugang niini.