GIKLARO sa pangulo sa Cebu Provincial Police Office (CPPO) nga adunay pagtugot gikan sa iyang mga labaw ug sa Commission on Elections (Comelec) ang pagpadala niinig tropa sa lungsod sa Daanbantayan, Sugbo.
Nasayran nga duha ka mga team sa Special Reaction Unit (SRU) ug usa ka platoon sa Phil. Army nga sakop sa 78th Infantry Battalion gikan sa Central Command (Centcom) ang gipadala usab sa maong lungsod.
Kini aron pagsiguro nga di moulbo ang kagubot kon molingkod gyod si Engineer Augusto Corro isip mayor sa lungsod hulip kang Mayor Sun Shimura.
Una niini, gikuwestyon sa kampo ni Corro ang pagpadala og SRU ingon man military sa maong dapit kon duna bay pagtugot sa Comelec sanglit ang PNP ubos man karon sa Comelec control.
Matod ni Digal nga ang tanan niyang mga lakang dunay pagtugot ni PRO-7 Director Chief Supt. Lani-o Nerez ug ni Provincial Comelec Director Lionel Marco Castillano.
Gipasabot niya ang ilang tuyo mao lang ang pagmintinar sa kahusay ug kalinaw ug di sabton nga aduna silay gidapigan.