SECTIONS
Thursday, June 27, 2019
SUPERBALITA CEBU

Sugilanon: Ang piniling asawa

USA ka bulan human sa kasal nilang Fluoraine ug James nagkita sila si James ug Treddy sa usa ka imnanan sa Pelaez. Si Treddy maoy ‘best man’ ni James sa ilang kasal ug suod niya nga higala. Samtang nagpadayon ang ilang tagay diin nagkapakot lang ang ilang gi-estoryahan, gikan sa pagdaog nga ‘overall champion’ sa Cebu City sa CVIRAA ngadto sa pagdaog sa Gilas Pilipinas batok sa Kazhakstan aron makaabot sa FIBA Basketball World Cup, nasal-utan ni Treddy og pangutana si James bahin kang Fluoraine.

“Bay James, ayaw lang kasuko, ha! Duna koy ipangutana nimo nga wa nako ikabungat niadtong uyab pa mo ni Fluoraine hangtod na nga gikasal mo sa simbahan sa Katedral,” matod ni Treddy.

“Di man kaha na makadaot nako, Bay! Shoot it!” ni James nga mitan-aw sa seryuso nga nawong ni Treddy.

“Ngano man tuod nga si Fluoraine man imong gipangasawa nga matod pa sa mga babaye ug lalake natong kaila, ‘bati’g nawong’ ug niwang pa gyud,” ni Treddy nga mitutok kang James.

“Okey ra na nga manaway sila sa akong asawa; ila nang katungod. Basta ako, I love my wife so much! Mapinanggaon siya. Ug labaw sa tanan, gimahal sab niya ako. ‘Faithful’ siya nga pagka asawa,” ni James nga miyarok sa beer nga iyang gitagay sa beer mug.

“Okey. Nakadiparal man god ko nga sa inyong dapit sa Panaghiusa may mga silingan mong mga guwapa nga kapilian, nga may pagtan-aw kanimo ug naghuwat lang unta sa imong pagduol,” ni Treddy nga miyarok pod sa iyang tagay.

“Nganong nakaingon ka ana, Bay Treddy?”

“Si Juvelyn, imong silingan ug kauban nakong call center agent sa IT Park, nag-ingon nga ‘crush’ ka niya kay guwapo ka ug macho pa, apan wa tingali ka kakita sa iyang katahom ug ka-seksi. Ang imo kunong panan-aw na-pukos sa maestra ninyong silingan nga gawas nga bati og nawong, niwang pa gyud kuno. Mipuno pa siya nga ngalan ray nindot ni Fluoraine.”

“Ah, si Juvelyn! Tinuod bitaw, seksi siya ug guwapa, Sa pagka tinuod, Bay Treddy, naibog ko niya, uy! Ikaw, bi, wa ka maibog niya?”

“Kinsa goy di makaher kang Juvelyn, Bay James? Ibog man gani si Sir Victor, among manedyer, nga minyo na. Apan may uyab na man ko, si Beatrice, usa ka CPA. Di na lang ko mangulitawo niya.”

“Mao na diha, Bay James, nga wa ko manguyab kang Juvelyn bisan sa iyang kaanyag ug kabigot sa lawas nga maoy gipangandoy sa mga lalake nga sama nato. Nakabantay man ko nga daghang mga lalake nga mobisita niya, kay atbang ra god mig balay. Kon nangulitawo pa ko niya daghan kog karibal. Di ba hasol ug samok?” ni James. Misenyas siya sa weyter nga dad-an silag upat ka botelyang beer.

“Tinuod na, Bay. Ako gani, may karibal ko kang Beatrice nga CPA sab, pero ako ang gisugot niya, kay ako gyud ang iyang gihigugma.”

“Mao nga si Fluoraine ang akong gipanguyaban, Bay, kay yano lang siya nga pagka babaye ug dili kapritsusa. Dili pod baya siya bati kaayog nawong. Kita bitaw ka didto sa simbahan nga mi-anyag siya tungod sa ‘make-up.’ Niwang tuod siya, pero ako siyang patambukon sa akong gugma, Hehehe!” ni James nga matiawon.

“Bitaw, Bay James, ngano man tuod nga si Fluoraine man ang gipili mong pangasaw-on?” seryuso nga misukna pag-usab si Treddy.

“Sultihan tika sa tinuod, Bay Treddy! Siya akong gipili kay bati siyag nawong ug niwang.

Segurado ko nga kon tua siya sa eskuylahan way lalakeng moduol niya aron tentalon siya. Kon sa among balay, ikabilin ko siya nga wa koy kabalak-an nga may lalakeng mosuway paghuong sa iyang pagka babaye. ‘Assured’ ko nga ‘faithful’ siya nako!” ni James.

Miyango-yango si Treddy nga mipatuybo sa iyang tuo nga kumagko. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph