ANG Abellana National School - Disaster Risk Reduction and Management (ANS-DRRM) nga gilangkoban sa mga magtutudlo ug mga tinun-an nga boluntaryo sa ANS Rescue Group, Inc. usa sa mga grupo nga ning-apil sa Lahug River Clean-Up niadtong Marso 9, 2019.
Atol sa pagpanglimpiyo, ang grupo sa ANS nadistino sa Station 4 sa Echavez Bridge duol sa Barangay Lorega, dakbayan sa Sugbo.
Ang kataas sa Lahug River, gibahin sa gatosan ka mga buluntaryo gikan sa nagkalainlaing grupo o organisasyon nga dungan nanglimpiyo sa naasoy nga adlaw subay sa panawagan sa Cebu City Environment and Natural Resources Office (CCENR) ug ubos sa pagpasiugda sa kagamhanan sa dakbayan sa Sugbo.
Si Cydtheresa V. Gabor, founder sa ANS Rescue Group Organizer ug ANS CNT Teacher (CISCO Networking) sa ANS nagkanayon nga usa kini sa pagdasig sa uban bahin sa pag-apil sa boluntaryong kalihokan alang sa pagpanalipod ug pagpalambo sa kalikupan.
Kabahin usab kini sa pag-umol sa edukasyon sa kabataan nga wala lang makatutok sulod sa upat ka bungbong sa lawak-saringan apan, ang pagkat-on pinaagi sa ilang kasinatian sa gawas sa tunghaan aron pagtabang sa komunidad sama sa river clean-up, dugang ni Gabor.
Ang kalimpiyo sa atong palibot dili lang makaayo sa panglawas sa tawo ug alang sa kanindot sa palibot apan, nagpaminos sa trahedya nga mahitabo sama sa paglunop tungod sa barado sa basura nga suba ug ubang agianan sa tubig panahon sa pagbunok sa uwan, dason sa magtutudlo sa ANS.
Karon milambo na ang kahimtang sa Lahug River. (PR)