SECTIONS
Sunday, May 26, 2019
SUPERBALITA CEBU

Nahadlok na kaayo

ANG brutal nga nahiaguman sa dalagita nga si Christine Lee Silawan, 16, nakapaalarma ug nakahatag og kabalaka sa mga bata ug mga ginikanan sa Dakbayan sa Lapu-Lapu.

Bisan na gani kadtong mga ginikanan, kansang anak anaa na sa kolehiyo, gi-monitor na ang ilang mga anak matag karon ug unya.

Kaniadto giangkon ni Filipa Quimque, taga sitio Soong, Barangay Mactan, nga magpaabot lang siya sa ilang balay nga makapauli na ang kamanghuran sa upat ka mga anak ug nag-inusara nga anak babaye.

Ang iyang anak nagtungha sa kolehiyo sa dakbayan sa Sugbo.

Human sa nahiaguman ni Christine Lee, matag karon ug unya na ang pag-monitor niya sa anak, tungod sa kahadlok.

Susama usab niini ang gibati sa laing inahan nga si Leonora Tradio, taga sitio Mahayay, Barangay Bankal, kansang balay nahimutang pipila ka metros diin nakit-an ang lawas ni Christine.

Ang kamanghuran niini nga anak babaye usab ang anaa sa grade 8 sa Bankal National High School.

Karon tuyuon na niya sa pagkuha sa gawas sa tunghaan, pagsiguro lang nga makauli nga luwas.

Gihulagway sa duha ka mga ginikanan, nga nasakitan man gani kaayo sila sa nahiaguman ni Christine nga di nila kaliwat, hinungdan nga extra careful sila alang sa ilang mga anak, ilabi na sa mga babaye.

“Kon mahimo pa lagi mag-atang na lang sad ta ko didto sa gawas sa eskwelahan sa university asa graduating akong anak, kay magabin-an na baya na siya og gawas, nya maglinya pa og taas sa Parkmall, makuyawan na gyud kaayo ko oy. Mao na ako gyud na siya giingnan, nga seguruon okay permi ang cellphone aron matawagan dayon, kon asa na siya, ug kon naa na sya sa Lapu-lapu mag-atang na dayon ko niya,” saysay ni Quimque sa Superbalita Cebu.

Gitug-an ni Ken Anthony Mendoza, 13, nga nga kaniadto makadlawnan na siya sa gawas sa balay.

Sukad niadtong Lunes, bisan kon lalake siya, matod ni Mendoza nga human sa iyang klase lahos na siya uli sa ilang balay.

HINABANG NI DUTERTE

Nibisita sa haya ni Christine si Office of the Presidential Assistance for the Visayas (OPAV) Secretary Michael Dino sa balay niini sa Brgy. Mactan dakbayan sa Lapu-Lapu.

Sa iyang pagbisita, gitunol ni Dino ang P20,000 nga hinabang ni Presidente Rodrigo Duterte ngadto sa nagbangutang pamilya. Gibutyag ni Dino nga gisugo siya sa Presidente sa pagbisita sa haya sa dalagita ug nipadangat sa iyang pahasubo lakip ang pagtugon nga ipasulbad sa kapulisan ang kaso.

Sama sa Presidente gikondenar ni Dino ang linuog nga pagpatay sa dalagita.

Gawas sa P20,000 nga hinabang gikan sa Presidente, si Dino personal nga modugang usab og P100,000 isip reward money alang sa kasulbaran sa kaso ni Silawan. Samtang laing dugang P100,000 usab alang sa reward money ang personal nga ihatag usab sa higala ni Dino nga si Philippine Postal Corporation (Philpost) chairman Norman Fulgencio.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!