USA ka negosyante ang gipusil sa nag-inusara nga tawo sulod sa buwangan sa Gallera de Mandaue sa Barangay Tabok, dakbayan sa Mandae, Huwebes sa alas 10:15 sa gabii, Marso 14.
Si Esidro Go, 53, minyo, molupyo sa Barangay Pitogo, lungsod sa Consolacion, adunay mga negosyo nga paabangan nga apartment ug fishpond.
Nakaangkon si Go og samad pinusilan sa likod, sa duol sa tangkugo. Natabang dayon siya ug gidala sa labing duol nga tambalanan.
Sa inisyal nga pakisusi sa kapulisan sa Basak Police Station, si Go nagtindog sa gaffing area sa sabungan sa dihang usa ka wala mailhi nga lalaki ang kalit lang nipusil kaniya sa likod nga bahin.
Ang mamuno gihulagway nga nagsuot og short, nag-sweat shirt ug nag-surgical mask ug nag-ballcap og pula. Dali usab siya nibiya sa lugar human sa pagpamusil.
Sa nakita sa CCTV footage sa sulod sa buwangan nga sa dihang nakasandig si Go sa bildo, dihadiha dayon namusil ang gunman.
Suwerte na lang nga tungod sa bildo, susama og tapsing lang ang naangkon nga samad sa biktima.
Sa dugang pakisusi, gitug-an ni Police Insp. Armil Coloscos, deputy chief sa Basak Police station, nga nasuta nila nga gawas sa pagka-negusyante, si Go kanunay usab sa maong buwangan isip kustomer ug mao usab usahay tigtaud og buwang ngadto sa mga manok igsasabong.
Gisubay karon sa kapulisan nga motibo sa krimen may kalambigitan sa negusyo ug sa iyang kanunay nga anaa sa sabungan.
Mohimo usab sila og background check ni Go.
Human sa pangpamusil, matod ni Coloscos, nga usa si Jonas Cortes, congressman sa 6th district diin nahisakop ang Mandaue City, ang dali nga nituyo sa crime scene.
Gitug-an ni Mandaue City Police Office Director, Police Colonel Julian Entoma nga dili staff o kawani ni Cortes si Go, apan suod lang nga higala, hinungdan nga dili usab nila masulti nga politically motivated ang krime.
Hinuon, gawas sa personal grudge ug may kalambigitan sa negusyo, giangkon sa direktor nga gisusi nila ang uban pa nga posibleng motibo sa krimen ug pag-ila sa armadong tawo.