KAPULISAN sa Mandaue City Police Office mopasaka og kaso batok sa usa ka prendahanan og mga gadget nga nahimutang sa Barangay Gun-ob, dakbayan sa Lapu-lapu.

Kasong kalapasan sa Anti-Fencing Law ang ipasaka sa mga pulis sa MCPO batok sa maong prendahan.

Kini human nasuta nga ang maong prendahanan ang bagsakanan sa mga kinawat sa giila nga notadong kawatan ug manglukabay ug sakop sa salisi gang nga si Irene Pelayo, kinsa naila usab nga Cynthia Pelayo Cynthia Lopez.

Kasamtangan nga gipugngan una ang pangalan sa maong establisemento samtang wa pa makuhai sa ilang habig.

Matud ni Police Colonel Julian Entoma, pangu sa MCPO, nga lakip sa na-recover gikan kang Pelayo ang usa ka resibo nga giprenda niini ang usa sa mga kinawat nga laptop ngadto sa maong prendahan.

Gibisita dayun ang prendahan sa mga sakop sa Centro Police Station niadtong Huwebes sa hapon, Marso 14.

Sa ilang pagbisita, nasuta sa mga sakop sa kapulisan nga dili lang usa, gani 15 na ka mga laptop nga gipang-ila mismo sa mga tag-iya nga nakawatan nga ila, ang anaa gi-prenda sa maong prendahan.

Ang maong mga laptop ang gipang-prenda mismo ni Pelayo.

Gani nahibaw-an usab nga lain-lain ang mga pangalan nga gipangdala ug mga identification card nga ipang- presentar ni Pelayo sa maong prendahan.

Sa dihang gihangyo sa mga pulis ang prendahan nga ipang-uli na ngadto sa mga biktima ang ilang mga laptop, giingon nga nagdumili kini sa paghatag kon dili mabayran ang kantidad nga ilang nahatag sa matag item, atol sa pag-prenda niini.

Duda sa mga pulis nga konsabo ang maong tindahan si Pelayo.

Gani giawhag pa ni Entoma bisan kadtong mga taga dakbayan sa Sugbo, Lapu-lapu ug silingan nga mga lungsod nga nabiktima og lungkab, diin kasagaran mga boarding house, sa pagbisita sa Centro Police Station ug aron makuyogan sa mga pulis ngadto sa maong pawnshop, aron pag-ila sa mga laptop nga posibleng ilaha usab.

Kahinumduman nga niadtong Miyerkules sa buntag, Marso 13, nasikop si Pelayo, lumad nga taga dakbayan sa Bogo, human kini nasakpan sa tag-iya sa usa ka boarding house nga iyang gilungkab, sa Barangay Alang-alang, dakbayan sa Mandaue.