SECTIONS
Tuesday, March 26, 2019
SUPERBALITA CEBU

Loot mihagit; Fralz di na moserbisyo?

GIKWESTYON ni Daanbantayan Mayor Vicente Loot kon nganong kasong administratiba ang gipasaka sa Department of Interior and Local Government (DILG) batok niya.

“Nahibong ko ngano admin case. Kon duna sila’y evidence, criminal case unta,” sumala sa mayor sa pamahayag nga gipadala ngadto sa mga tigbalita pagka Biyernes, Marso 15.

Si Loot ug laing 45 ka giingong narco-politicians ang ginganlan ni Presidente Rodrigo Duterte atol sa sa tigom sa National and Regional Peace and Order Council sa siyudad sa Davao niadtong Huwebes sa gabii, Marso 14.

Gawas kang Loot, apil sa opisyal sa Sugbo nga gibutyag sa Presidente mao si San Fernando Vice Mayor Fralz Sabalones, ang igsuon sa niangkon nga drug lord, Franz Sabalones.

Si Fralz kay taudtaod nang wala mopatim-aw sa munisipyo sa San Fernando.

Si Duterte sa iyang pakigpulong sa tigom, nitug-an nga ang DILG nakapasaka na og mga kasong administratiba batok sa mga opisyal nga iyang ginganlan niadtong Huwebes, Marso 14, ngadto sa Office of the Ombudsman gumikan sa giingong kalambigitan sa illegal drug trade.

Sumala ni Loot nga iyang atubangon ang kaso nga gipasaka batok niya ug iyang tubagon.

“Let’s wait for that venue DILG and PDEA (Philippine Drug Enforcement Agency) has provided where. At long last, I can finally get to clear my name,” dugang ni Loot sa mensahe sa SunStar Cebu.

Siya gitambagan sa iyang mga abogado nga ipresentar ang tanan niyang mga ebidensiya labi na ang Investigation Report nga maglimpyo sa iyang pangan.

DI NA MOBALIK

Daw wa nay plano mopatim-aw pa sa iyang trabaho isip bise mayor sa lungsod sa San Fernando si Fralz Sabalones.

Si Sabalones, igsuon ni self-confessed drug lord Franz Sabalones, niduso na usab og extention sa iyang leave hangtod na sa Hunyo 28, duha ka adlaw sa di pa mapupos ang iyang termino.

Si Fralz lakip sa mga incumbent official sa gobiyerno nga ginganlan ni Duterte isip narco politician.

Sigun sa Human Resource staff sa lungsod sa San Fernando nga si Niño Ergero, gihurot na ni Fralz ang iyang paid vacation ug sick leave credits.

Gitug-an ni Ergero nga niadtong Marso 6, gilugwayan ni Fralz, pinaagi sa iyang staff, ang iyang pag-leave isip bise mayor sa lungsod.

Gigamit na ang nahibilin niini nga 7.5 vacation leave credits ugang 21.5 sick leave credits.

Matod niya, with pay kini hangtod sa Abril 16.

Dugang ni Ergero, nga kon mapupos ang paid leave sa piniling bise mayor, may giduso na usab kini daan nga leave gikan sa Abril 17 hangtod Hunyo 28 karong tuiga.

Sigun sa HR staff, without pay o wa nay madawat nga sweldo ang opisyal.

“Ang last ana, Ma’am, nga with pay pa kay April 16, sa pag-April 17 to June 28, nag-file gihapon, Ma’am, pero leave without pay na,” niingon si Ergero.

PAMULITIKA?

“Gidisiplina mi sa among amahan nga ampingan among pangan. Bisan pag inom, sigarilyo, sugal ug labi na ang drugas, kontra kaayo na nako”.

Kini ang pamahayag ni Leyte 3rd District Rep. Vicente “Ching” Veloso sa pagkalakip niya sa “narcolist” nga gipagawas ni Duterte.

Matod ni Veloso sa Superbalita Cebu, politically motivated ang pagkalakip niya sa “narcolist.”

Gihulagway ni Veloso nga tinalawan ug way klarong basehan ang gihimo sa kontra niya sa pulitika nga maoy gituhoang nagpaluyo niini.

“Kinsa man ang may motive to defame me? Well, we are a little more than one month away from election. So, ang ila diri, natural ang kontra nako sa pulitika,” matod ni Veloso.

Matod ni Veloso, gigamit lang ang Presidente ug klaro nga malisyuso ang pagkalakip kaniya. (SCG, AZLG, JKDP)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!