SECTIONS
Wednesday, May 22, 2019
SUPERBALITA CEBU

Bueno nasikop sa Davao

ANG nag-unang suspek sa pagpatay sa 60-anyos nga mag-uuma sa Danao City, amihanang Sugbo, niadtong Enero, nadakpan sa Dakbayan sa Davao, Biyernes sa alas 5 sa hapon, Marso 15.

Si Jonas Martel Bueno usa usab sa mga persons of interest sa pagpatay kang Christine Lee Silawan, kinsa napalgang patay niadtong Lunes sa kaadlawon, Marso 11, sa bakanteng luna sa Brgy. Bankal, Dakbayan sa Lapu-Lapu.

Tungod sa pagbaha sa simpatiya sa publiko sa pamilyang Silawan sukad niadtong Lunes hangtod sa Biyernes, niabot na og P2 million ang patong sa ulo sa killer ni Silawan.

Kagahapon, usa ka informant gikan sa Davao City, ang nipahibawo sa kapulisan nga si Bueno nakit-an sa mao nga siyudad.

Si Sinas gikutlo sa taho sa usa ka mantalaan sa kaulohan nga si Bueno ang suspek sa pagpatay kang Silawan.

Samang report nagkutlo kang Sinas nga nisulti nga ang kapulisan sa Sugbo nagpangita kang Bueno sa kabukiran sa lungsod sa Sogod, amihanang Sugbo.

Apan sa interview na sa mga sakop sa media sa Sugbo sa Biyernes sa hapon sa Camp Sergio Osmeña, si Sinas nanghimakak na nga si Bueno suspek sa pagpatay kang Silawan.

Iyang gipapangita si Bueno sa pagpatay kang Batucan, nga susama og pamaagi sa pagpatay kang Silawan, di tungod kay siya suspek.

Nasikop si Bueno sa hiniusang pwersa sa National Bureau of Investigation (NBI)-Davao ug Criminal Investigation and Detection Group (CIDG) Davao City.

Si Bueno dunay arrest warrant sa kasong murder nga giisyu ni Danao City Regional Trial Court Branch 25 Judge Jerry Dicdican sa pagpatay kang Trinidad Roble Batucan, 60, niadtong Enero 11.

Ang nawong padung sa dughan ni Batucan gilaplapan.

Ang pagpatay kang Batucan susama sa nahitabo kang Silawan, kinsa gilaplapan usab ang nawong ug gikuha pa ang dila, ubol-ubol ug tuo nga dunggan.

Mao kini ang nakapa-interest sa kapulisan kang Bueno.

Ang iyang duha ka mga igsuon nga sila si Junrey ug Juvy Bueno napatay sa engkwentro tali sa kapulisan niadtong Enero 13.

Ang magsuong Bueno giingong mga sakop sa usa ka kulto sa bukirang mga barangay sa Danao City.

NGANONG NATULTOLAN

Si CIDG Davao City Field Unit head Police Chief Inspector Milgrace Driz niingon nga ilang natultolan si Buenco human ang iyang Facebook account sa ngan nga Jason Martil ni-circulate sa online.

“Naay CI ang name kasi ginamit Jason Martil sa FB sa FB nikalat. Nakakuha ta informant same feature sa face,” siya nidugang.

Ang operasyon gipahigayon sa CIDG, Mindanao Area Police Intelligence Office (Mapio), NBI, Regional Intelligence Unut (RIU 11), ug Davao City Police Office (DCPO) Police Station 3. Si Bueno gitanggong sa NBI 11.

Sa interrogation sa CIDG, si Bueno wa moangkon nga siya ang nipatay kang Silawan.

Sayo pa, si Presidente Rodrigo Duterte nimando sa kapulisan sa pagsikop sa mga mamumuno ni Silawan.

WAY EBIDENSYA

Matod ni Sinas nga sa pagkakaron wa pa silay ebidensya paglambigit kang Buenco sa pagpatay kang Silawan.

Natingala siya nganong naa sa national news nga nadakpan na ug migawas pa ang hulagway nga nagtumbok nga siya ang nipatay sa 16 anyosa sanglit wa siyay gitugotan sa iyang mga sakop nga mohatag sa maong hulagway.

Iya na usab nga gimandoan ang PNP Crime Lab nga mohimog scientific investigation sa nahitabo sa Danao ug itandi sa nahitabo kang Silawan.

Kon motakdo nga susama ra ang hitabo, dinhi pa mohukom ang PRO 7 nga adunay nahitabong serial killings.

“We are thinking once mobalik na ang atong medico legal kay toa sila sa Manila karon kay nag-consult with their chief kon naa ba silay expert ato, so that we could shed light kung naa bay involvement si jonas o wala base on the type of modus or the type of killing. Kay kon mogawas nga siya, murag serialized killing,” matod ni Sinas.

Giangkon ni Sinas nga aduna na silay lead sa kaso ni Silawan ug aduna na silay nakuha nga mga ebidensya nga makatumbok sa mga suspek.

Nakig alayon na usab sila sa NBI aron mausa nalang ang ilang rombo sa pag-imbestigar sa kaso.

Si Lapu-Lapu City police director Sr. Supt. Limuel Obon niingon nga ilang giimbestigar ang krimen ni Bueno isip siya person of interest, di kay suspek.

Ilang gitandi ang pagpatay kang Batucan ug Silawan.

Wa usab silay ginganlan ni bisan kinsa nga maoy killer ni Silawan, nga maoy iyang reaksyon sa taho sa nasudnong mantalaan.

Nihulagaway si Obon sa taho nga fake news.

Matod niya nga mainampingon kaayo sila sa ilang imbestigasyon aron ang ilang mapasakaan og kaso di fake suspek.

“If pagdating ng panahon ay may sabihin na lang natin by chance, ay ito nga talaga yung dumating na suspect after ng follow up operations natin na ginagawa, confirmations na hindi tayo maku-kwestyon saan mang anggulo na yun po talaga ang suspek, kawawa pa yung tao (Buenco) na pinakita baka sakaling hindi siya ang suspek,” pasabot ni Obon.

CCTV

Ang Special Investigation Task Group nga gipangulohan ni Obon uban ang CIDG 7 nagtinabangay na sa pagkuha pa og dugang ebedensya.

Si Supt. Carlito Patay, hepe sa CIDG 7, nitug-an nga adunay tulo ka nga CCTV camera nga ilang gitan-aw nga posibling nakakuha sa pagsakay ni Silawan sa motorsiklo.

Apan wa silay nakita nga maklaro ang pagsakay ni Christine sama unta sa pagdala niini sa usa ka hawan nga lugar sa sitio Mahayahay, Barangay Bankal.

“Naa unta toy cctv katong pasulod didto kon asa siya gilabay pero ngitngit kaayo. Kon adlaw maklaro ang video. Pero pag gabii, itom na imong makita,” matod ni Patay. (Juliet Revita sa Sunstar Davao, AYB, GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!