ANG kaso sa Violence Against Women and their Children (VAWC) sa dakbayan sa Davao ang miubos sa nakalabay nga tuig.
Sa datus gikan Philippine National Police (PNP) sa rehiyon sa Davao, sa 2017, nakatala og 2,861 ka VAWC cases sa lungsod, apan mas miubos ang sa 2018 nga miabot lang sa 1,123 o mikunhod og 60 porsiyento.
Gibutyag ni Police Senior Inspector Ma. Teresita Plaza-Gaspan, tigpamaba sa Davao City Police Office (DCPO), nga miubos kini tungod misaka sab ang kaalam sa kababainhan labot sa ilang katungod.
“Ang sa Davao City Police Office, meron tayong mga interventions. Naga-lecture atong mga Women and Children’s Protection Desk sa mga eskwelahan sa mga crime preventions especially yung mga laws that protect women and children. Tayo ay patuloy na nag-educate sa mga bata from kinder to high school kung unsa ang appropriate touch, good touch or bad touch mahitungod sa pagtaas sa sexual abuse o rape,” ingon ni Gaspan.
Gidugang sab ni Atty. Imelda Evangelio sa Office of the Special Counsel on VAWC sa City Mayor’s Office nga taas sab ang kaso sa ‘economic abuse against women.’
Niya pa, sa usa ka adlaw, dunay napulo nga managtiayon nga moagi og counseling sa ilang buhatan.
Gidasig sa mga nahisgutang opisyal ang mga kababainhan nga mosumbong sa ilang buhatan kung sila dagmalan o makasinati sa pagyatak sa ilang katungod. (Gerald E. Canonigo, Juvylen A. Centinales, Emmanuel Fernando Legarde/UM Interns)