TUNGOD sa sunod-sunod ug tag-as nga scheduled power interruption sa Visayan Electric Company (VECO) sa pipila ka mga konsumidor niini, naalarma ang Metropolitan Cebu Water District (MCWD) niini tungod kay maapektohan ang ilahang supply sa tubig.
Subay niini magtagbo ang duha ka kompanya sa Miyerkules, Marso 20 aron mahisgutan kini.
Matod sa tigpamaba sa MCWD, Charmaine Rodriguez-Kara, nga maapektohan ang ilahang operasyon tungod kay aduna’y pipila ka mga tabay nga dili magamit kon wala’y kuryente.
Usa sa aduna’y dako nga porsyento sa supply sa tubig sa MCWD kining anaa sa ilawm sa yuta o ang ground water source.
Tungod usab sa grabeng kainit dala sa weak El Niño anaa na sa kritikal nga lebel ang Buhisan Dam sa siyudad sa Sugbo samtang ang Jaclupan Diversion Weir sa siyudad sa Talisay nag-anam-anam usab kini og ubos.
Dugang ni Kara nga ilahang hisgotan kining mga wala’y kuryente nga dapit nga maigo ang ilahang supply nga gikan sa mga atabay.
Huwebes, Marso 14, dihang nagsugod ang VECO sa ilahang power interruption sa nagkadaiyang parte sa Metro Cebu diin moabot kini hangtod walo ka oras.
Molungtad usab kini karong Miyerkules, Marso 20, base sa labing uwahi nga update sa VECO.
Nasayran nga nagpabilin nga anaa sa 1,000 cubic meters matag adlaw ang masupply nalang sa Buhisan Dam gikan sa 6,000-7,000 cubic meters nga normal niini.
Samtang anaa sa 23,400 cubic meters ang Jaclupan Dam gikan sa 33,000 nga normal niini.
Karung ugma, Dominggo, Marso 17, aduna’y walo ka oras nga water interruption ang Oprra, Peace Valley, Green Valley, Sitio Ipil-Ipil, Sitio Lubi-Lubi, Upper Kamputhaw, Sitio Mabugnaw, Sitio Care, Purok 8, Juana Osmeña Extention sa siyudad sa Sugbo, tungod kay wala’y kuryente.