WA NAGPALUPIG ang Dacidba officers ladies sa mga kontra aron mohari sa 82nd Araw Ng Dabaw Open Bowling Tournament nga giorganisa sa Sunday Bowlers Club (SBC), gidula sa Fairlanes Bowling Center, Marso 5 hangtud 9 ning tuig.
Ikaduha ang tim Yazi samtang ang misunod sa duha ka puwesto mao ang CLVR-MJC ug Dacidba officers men.
Una niini, sa up-d-ladder championship gipalukapa sa Yazi ang Dacidba Men sa iskor 564-537 aron makontra ang CLVR-MJC diin gipildi nila kini sa puntos nga 545-535.
Tungod niini, naka-atbang nila ang Dacidba ladies kinsang maoy dunay “twice to beat advantage” human nanguna sa eliminasyon.
Nakuha sa Yazi ang unang daug sa iskor 543-520 apan pakyas sila sa ilang tinguha nga modaug sa kompetisyon human gipayukbo sila sa Dacidba ladies sa ikaduhang duwa sa puntos nga 548-516.
Samtang ang midaug sa highest pinning nga dunay iskor 96 mao si Raquel Basan ug ang highest Ind. Single nga 135 puntos gihimo ni Tommy Sinsano.
Si Titing Banluta ang nanguna Highest Ind. Double nga mipatumba og 255 pins ug ang Highest Ind. Average nga 117.16 natala ni Jay Libres.
Ang highest Team Single nga 581 pins gikan sa D’New Brothers ug ang Highest Team Double mao ang Dacidba officers ladies.
Sa bahin sa master dibisyon, mikampeyon si Jay Libres human gipildi si Nonoy Baluyot sa iskor 95-92.
Samtang, anaa sa ikatulong puwesto si Bing Pogoy ug ikaupat si Emy Dejiga.
Ang mga midaug sa torneyo nakadawat og premyong kuwarta ug tropeyo gikan sa lokal nga panggobyerno sa Dabaw nga gisuportahan sa Sports Development Division Office. (Marizz R. Perez )