DAKUNG lalis, mga higala, sa mga katawhan mao ang topiko bahin sa atong sinugdanan. Asa man ta gikan? Tuohan ba nato ang Bibliya? O ang teorya sa Big Bang nga ang tanang butang nagagikan sa dambuhalang pagbuto, minilyon ka mga tuig na ang milabay?
Ang Bibliya nagasulti kanato nga gikan daw kita sa abog. Ang teorya sa Big Bang nagaingon nga gikan kita sa unggoy. Kung ikaw ang papilion, higala, unsa imong gusto? Gikan ka ba sa abog, o gikan sa unggoy?
Ang pagtoo nga kita gikan sa unggoy nagasulti sa teorya sa Ebolosyon. Kini nga pagtulun-an nagatuo nga ang tanang butang nagagikan sa gagmay’ng butang (micro particles) nahimong mga gagmay’ng organismo (micro organism), na-develop ug nagdagko sulod sa minilyon ka mga tuig, hangtud nahimong mga gagmay’ng mananap sama sa tiki.
Sa pikas bahin, dinhi na pod ta sa inabog nga istorya. Ingon pa sa Bibliya, gi-umol sa Diyos ang tawo gikan sa abog o yuta. Tingali Iyang gi-apilan og tubig aron maumol jud og ayo.
Iyang gisundog ang Iyang nawong sa pagbuhat Niya sa tawo. Unya, Iya dayong gihuypan og ginhawa sa kinabuhi ang Iyang giumol nga abog. Paghuman niana, nabuhi ang tawo. Mirakulo, higala ko, ang pagmugna sa tawo.
Karon, unsa man ang imong tuohan? Bisan pa higala nga plastar daw ang teorya sa ebolusyon, apan daghan kita og pangutana parte niini.
Sanglit, sa pagtoo sa Bibliya, sayon ra higala. Ang Diyos tumang makagagahum. Mahimo Niya ang tanan nga gusto Niyang himuon. Samtang mangutana ka pa sa kapasidad sa kinaiyahan giunsa mahimong tawo ang tiki, sa Bibliya, matubag kini og diretso sa punto- gibuhat sa Diyos ang tanan suno sa ilang klase.
Gisulti sa Diyos, namugna silang tanan. Dili na ka makapangutana kung giunsa namugna. Tuohi lang ang Ginoo nga adunay gahum sa pagbuhat sa tanang butang.
Kining duha ka mga pagtuluohan nagakinahanglan sa igong pagtoo, kay sa teorya sa ebolusyon, wala man poy nakakita sa gitawag nilang evolutionary development, o pag-develop sa tiki nga nahimong toko.
Sa Creation theory sab, wala man pod ta didto pagsulti-sulti sa Diyos nga “Ug may kahayag.”
Nagbuhat dayon ang Diyos og babaye, gikan gayud sa iyang gusok, pero gipatulog sa’ sa Diyos si Adan. Busa, wala pod siya nakasaksi sa pagka-Magbubuhat sa Diyos.
Kung ako inyong pangutan-on, sa Bibliya jud ko motuo. Kay ang pagkagikan nato sa abog, nagpasabot sa pagkamakagagahum sa Diyos. Liwat ako sa Iyang imahen, ug Iyang mga kamot gayud ang nag-umol nako. Busa, diyosnon ako nga pagkatawo. Tawo ako.
Ako nagatoo nga ang Diyos tinuod, ang Bibliya tinuod, ug sa pag-ingon sa Diyos nga gimugna Niya ako sama sa Iyang imahen, dili aka magduha-duha niana. Mao kini ang akong tuohan.