SULOP, Davao del Sur -- Daling gitunol sa mga barangay tanod ang usa ka armas nga ilang nakaplagan samtang nagronda sa Purok 10, Barangay Poblacion, alas 9 sa gabii, Biyernes, Marso 15.
Sumala sa taho gikan sa kapulisan, nagpatrolya ang mga tanod nga sila si Hernando Alaro Jr., ug Eduardo Mavicon, sa Brgy. Poblacion, dihang nabangalan ang usa ka kolor itom nga bag.
Dihang gihiling, nasuta nga aduna kini sulod nga kalibre. 38 paltik nga rebolber ug duha niini ka bala.
Ang maong bag gibilin sa usa ka payag kilid sa barangay road mao nga gipahibawo dayon nila ang kapulisan.
Gibutyag sa imbestigador nga si PO3 Jessie Mañacap nga wa pa silay matudlong suspek ug hinungdan sa pagbilin sa armas.
Apan, nanaghap ang kapulisan nga gibilin kini sa suspek tungod nahadlok sa mas gipakusgang kampanya sa mga loose firearms samtang nagkaduol ang midterm elections. (Orlando B. Dinoy)