MAGUINDANAO PROVINCE -- Nanghambog si Shiek Esmail Abdulmalik alyas Kumander Abu Toraife sa Bangsamoro Islamic Freedom Fighters (BIFF) nga inspired group sa Islamic State of Iraq and Syria (Isis) sa mga bag-o nilang matang sa armas.
Sumala pa nga ang maong mga armas kaya nga i-alkontra ang mga bag-ong armas sab sa Armadong Kusog sa Pilipinas ug sa Philippine National Police (PNP).
Una nang gikompirma sa militar nga tulo ka langyaw nga terorista ang napatay sa gilusad nga Law Enforcement Focus Military Operation sa probinsiya.
Target sa Joint Task Force Central sa militar ang mga kampo sa BIFF sa Liguasan Delta ug SPMS Box.
Anaa sa poder ni Shiek Esmail Abdulmalik ang uban pang mga langyaw nga terorista.
Sa taho sa intelligence unit sa militar, nasayran nga nagdawatan og pinansiyal nga tabang ang BIFF gikan sa Isis ug Jemmaah Islamiyah Terrorist nga maoy gipalit nila sa mga modernong mga armas.
Samtang daghan na nga mga kampo sa BIFF ang nailog sa Joint Task Force Central sa Maguindanao.
Misaka na karon sa 30 ka rebelde ang napatay samtang daghan ang naangol sa usa ka semana na nga operasyon sa militar sa SPMS Box.
Mitaas na sab ang ihap sa mga bakwit sa Maguindanao kung diin nanawagan og dugang tabang si Gov. Esmael Mangudadatu sa gobyerno.
Gawas sa mga bakwit, gitutukan sab sa LGU-Maguindanao ang mga dapit nga grabeng giigo sa ting-init hinungdan nga doble nga problema nga gisagubang sa probinsiya karon. (Edgar E. Fuerzas)