NINGBANGON gikan sa 20 puntos nga pagkalubong sa halftime ang Milwaukee Bucks aron makmakon ang host Miami Heat, 113-98, kagahapon sa National Basketball Association (NBA).
Ang 15 puntos nga kadaugan sa Bucks maoy labing dako nga labaw nga nahimo sa usa ka team nga nakabangon gikan sa 20 puntos nga pagkalubong sa nag-unang duha ka quarters sa kasaysayan sa NBA.
Lima ka mga magduduwa sa Bucks ang ningrehistro og dobleng numero nga puntos nga gipangulohan ni Giannis Antetokounmpo, kinsa nagpakatap og 33 puntos, 16 rebounds ug siyam ka assists.
“It doesn’t matter if you’re down 20, 15, 10,’’ matod ni Antetokounmpo. “We’re going to keep playing hard. It’s a process. You’ve got to win games like this. You’ve got to face adversity when you’re playing on the road. In the playoffs, it’s not going to be easy. We want to be a great team and that’s why we keep playing hard.’’
Sa 102 ka mga duwa nga nalubong sila og 20 puntos o labaw pa sa halftime, mao pa lang kini ang ikaduhang higayon nga ningdaog ang Bucks.
Ang labing una nahitabo niadto pang Pebrero 18, 1977 diin nabiyaan ang Bucks og 52-72 sa halftime apan mingdaog batok sa New York Knicks, 72-52.
Kagahapon, ang Bucks naggukod, 62-42, sa halftime.
Human niini, hinayhinay nang ninggukod ang Bucks hangtod nga nakompleto nila ang malisod nga misyon.
“We lost our energy in the second half,’’ matod ni Justise Winslow, kinsa maoy nangulo sa Heat pinaagi sa iyang 20 puntos, nga iyang nahimo tanan sa nag-unang duha ka quarters.
Sa kadaugan, napahugtan sa Bucks ang ilang paghupot sa Eastern Conference ug overall dala ang 52-17 nga rekord samtang ang Pistons naa sa ikaunom nga dapit sa Eastern Conference bitbit ang 35-33 nga rekord.
Sa 3rd quarter, nagbangis na og insakto si Antetokounmpo sa opensa ug depensa unya nakakuha sab siya og saktong suporta gikan sa iyang mga kauban.
Si Khris Middleton niamot og 21 puntos alang sa Bucks samtang nitampo og 17 puntos si Eric Bledsoe.
“To do what we did in the second half, I’m just pleased with the guys the way they were able to flip it,’’ matod ni Bucks coach Mike Budenholzer. “Our defense fuels our offense. We want that to be our identity."
Ang Heat sayo unta kaayong nakapainit sa ilang opensa ug nakaposte kini’g 25-8 nga labaw sa 1st quarter.
Aduna pa’y higayon nga niabot og 23 puntos ang labaw sa Heat.
Apan kon unsa kainit ang ilang opensa sa 1st half, nalupigan kini sa kabugnaw sa ilang duwa sa 2nd half. AP, ESL