GRADE six na ko dihang nakat-on og biseklita pinaagi sa akoang uyoan. Wa ko makasuway og crash kay grabe ko mainampingon. Pila ra man say paglayat. Diha ra hinuon ko na-crash pag fourth year high school na nako kay na-underestimate nako ang yuta nga sagol graba sa akong pagliko.
Niadtong batan-on pa ko, grabe ang akoang kahadlok kon magdulhog na ang biseklita mao nga grabe ko mokumot sa brake. Ambot ngano to.
Fast forward karong panahuna, di na kaayo ingon ana ang akong kulba sa pagdulhog. Bisan gani karon nga 29er na ang akong gigamit. Kaniadto wa ko mag-imagine mosaka og bukid bisan makaya ra nako ang tungas, kay ang pagdulhog makulbaan ko. Imagine, mo-apply kog brake bisan sa pagdulhog sa Brgy. Pit-os padung sa utlanan sa Brgy. Bacayan.
But kon wa ko mag-edad og 40, human usab mamatay ang among anak nga si Mary Heart, na interest ko sa mountain biking human ko galgala ni Bambam Gacko ug dayon nilang Embet Entice ug mga kauban. Ang akong first climb sa Barangay Guba. Ambot, nag-agwanta sila si Embet og agad nako kay makalima ko mopahuway. Mabalik mi sa balay alas 12 na nga unta makuha ra nang Guba og usa ug tunga sa oras nga way pahuway bisan hinay basta kanunay.
MIDDLE AGE
Dunay usa ka article kabahin sa midlife crisis, nga sagad moigo sa tawo sa edad nga 40. Naghisgot ni kabahin sa pagdaghan sa mga tawo nga nag-edad og 40 pataas nga nag-engage og sports nga wa nila mabuhat dihang batan-on pa sila.
Bitaw, sa mountain biking community, daghan ang naa na sa middle age sama nako. Ang uban maguwang nako while ang uban manghod nako. Tagsa ra ang mga batan-on kaayo nga mountain bikers.
Sa edad man gud nga 40 pataas, naa na diha manunga usab ang mga sakit. Bisan tuod wa sa huna-huna ang kamatayon, apan sa subconscious tingali magduwa ni. Naa usab ning edara nga gusto imatuod sa tawo nga di pa siya lawos, kaya pa niya ang mahimo sa mga manghod kaayo niya.
Mao gani nga ang uban nga dunay kaya moapil og mga triathlon nga wa nila buhata sa dihang mga batan-on pa.
IMPACT
Tungod usab sa edad, ang tawo conscious na sa panglawas. Apil na gani ini ang kahimtang sa panghuna-huna. Sagad naa na mosulod ang depression, labina sa mga tawo nga nagtrabaho sa grabeng pressure sa field, sama sa journalism. Di baya lalim ang kinabuhi sa journalist. It is a struggle.
Looking back, usahay makapangutana ko sa akong kaugalingon kon wa ba kaha ko masayop sa akong field.
Anyway, di na mabalik ang tanan. Ang importante nga bisan sa 40 anyos, akong nadiskobrehan ang mountain biking. There is no such thing as late. Di man ni lumba ang kinabuhi.