HUMAN ni Presidente Rodrigo Duterte ug ang PDP-Laban, higayon na sab ni Mayor Inday Sara Duterte-Carpio ug sa Hugpong ng Pagbabago (HnP).
Atong nasayran nga moanhi sa Sugbo ang HnP senatorial slate karong Marso 21. Lakip sa mga giindorso sa HnP mao ang pito ka mga kandidato nga giduso sa Visayas chapter sa Kilusang Pagbabago kun KP.
Kini mao sila si Dong Mangudadatu, Bato de la Rosa, Bong Go, Koko Pimentel, Francis Tolentino, Cynthia Villar, ug JV Ejercito.
Si Kong. Mangudadatu igsuon ni Maguindanao Gov. Toto Mangudadatu ug bayaw ni Genalyn, nga nag-una sa mga biktima sa gitawag nato karon og Maguindanao massacre.
Si JV sab mao ang principal sponsor sa Universal Health Care nga bag-o lang napirmahan ni Presidente Duterte.
Magsugod ang Central Visayas sortie sa HnP didto sa Syudad sa Tagbilaran sa Bohol ug ang mo-organisa sa maong rali diha sa Carlos P. Garcia Avenue atubangan sa City Square mao ang ABAKA kun Alyansang Bol-anon alang sa Kausaban (ABAKA).
Ang ABAKA mao ang alyansa nga nagpaluyo sa kandidatura ni kanhi Cabinet Secretary Jun Evasco, ang giingong tinuod nga Bol-anon.
Kaatbang ang ABAKA sa PDP-Laban nga nagsuporta sa kandidatura ni Kong. Arthur Yap.
SUGBO
Atong nasayran nga lahi sa usa ka hiniusang rali sa lalawigan ug Syudad sa Sugbo sa PDP-Laban, naay lain-laing mga kalihokan ang HnP.
Sa Marso 21, ang inisyal natong nasayran mao ang usa ka kalihokan diha sulod sa Skyhall sa SM Seaside.
Dayon, naa say rali diha sa Mandaue Sports Center uban sa hugpong nilang Mayor Luigi Quisumbing nga kaatbang sa PDP-Laban nilang Kong. Jonas Cortes.
Wa pa kitay detalye sa mga rali sa Lilo-an ug Syudad sa Danao nga ipahigayon sa sunod adlaw.
TUBIG
Samtang nanghinaut ko nga di delayed ang akong flight karong nagsulat niining lindog samtang nag-atang sa abyon pabalik sa Sugbo (Salamat kay on time), nabalaka ako sa kahimtang sa supply sa tubig diha sa Sugbo.
Unsaon nga nasinati man gud namo ang krisis sa tubig diri sa Manila. Mga duha ngadto sa tulo ka oras lang moagas ang tubig sa gipuy-an sa akong anak nga nagpuyo karon diri sa kaulohan ug magsawod sila anha gawas sa apartment.
Duna say mga kan-anan didto duol sa UP Diliman nga nanirado kay wa lagiy tubig. Sa UP Town Center, duna say mga kan-anan nga way service water ug bottled water.
Unsa na kaha sa Sugbo diin duna nay mga dapit sa Metro nga kadiyot lang moagas kon mograbi ang huwaw tungod El Niño. Alang kanako, panahon na nga molihok ang tibuok komunidad. (@anol_cebu sa Twitter)