MORAG og nalawgaw na ang nagpadayon nga imbestigasyon sa brutal og niluog nga pagpatay ni Christine Lee Silawan, ang 16 anyos nga dalagita nga nakit-ang patay niadtong Lunes sa buntag sa dakong wanang sa sitio Mahayahay, barangay Bankal, Lapu-Lapu City. Gumikan ba kaha kini sa kompetisyon sa mga investigating units mismo sa kapulisan nga iyahay lang og pangankon sa kredito. O ba kaha sa dakong ganti nga naghuwat alang sa tawo o mga tawo nga makatumbok sa mga suspek.
Matod pa sa panultihon nga ‘daghang kusinero posibleng mahamo ang sud-an’. Mag-inilugay sa kredito gumikan kay mi-abot na sa atensiyon sa Malakanyang ang isyo ug mismo si Presidente Duterte nga imbestigahan ang kaso, dakpon ug itaral sa hukmanan ang mga suspek. Daghan na ang misakay. Bisan si Public Attorney’s Office (PAO) chief Persida Acosta ug ang Volunteers Against Crime and Corruption (VACC) nisakay. Tiaw na nimo nga mituyo pag-anhi dinhi aron magpa-presscon.
Kinsay nipagawas sa hulagway ni Jonas Bueno, lider sa usa ka kulto sa bukirang lugar sa Danao City, nga gi-ingong maoy nagpatay sa dalagita? Nganong miabot man sa national media nga way kalibutan ang local media? Dili kadto moabot sa kaulohan kon way naghatag. Diin kadto gikan? Nganong kalit nitumaw ang pangalan aning Bueno?
Si Jonas, uban sa iyang mga igsoon nga si Juvy ug Junrey, dunay gipatay nga mag-uuma niadtong miaging buwan sa bukirang barangay sa Danao diin ila usab nga gilaplap ang nawong ug gikaon ang ubang parte sa lawas isip tipik sa ritwal sa ilang kulto. Matod pa nga sakop sa usa ka kulto ang managsoon. Napatay sila si Juvy ug Junrey sa mga pulis ug buhi si Jonas.Hinuon, maayo ang resulta kay gumikan sa pagkatap sa iyang dagway sa social media, nadakpan si Bueno sa dakbayan sa Davao. Apan sukwahi sa nanggawas nga balita, ang kapulisan niingon nga dili si Bueno maoy suspek sa kamatayon ni Silawan. ‘Person of interest’ ra siya.
Gidasunan ni Limuel Obon, hepe sa Lapu-Lapu City Police Office nga di si Bueno ang ilang suspek kay lain nga tawo, kinsa wanted sa laing kaso. Nailhan nila ug tayming ang gihuwat, ila nang madakpan. Aber, atong huwaton kon mao na ba na sa ingon mahatagan og hustisya ang kamatayon sa dalagita.