HUMAN sa luog nga pagpatay kang Christine Lee Silawan niadtong Lunes sa kaadlawon, nabanhaw ang isyu sa silot sa kamatayon. Duna na untay balaud sa death penalty, apan gilibkas ni niadtong administrasyon ni kanhi presidente, karon House Speaker Gloria Macapagal Arroyo.
Gusto sa mga netizen nga buhion ug ibalik ang silot nga kamatayon alang sa mga krimen nga grabe kaayo, sama sa illegal drugs, rape ug pagpatay.
Bunga ni sa kapungot sa mga netizen sa nahitabo kang Christine Lee, kinsang nawong gilaplap, gikuha ang dila ug ubol-ubol. Grabe ka luog ang pagkapatay nga bisan ang mga imbestigador sa kapulisan niingon nga una pa ning higayon nga dunay gipatay sa mao nga paagi.
Samtang nag-alintabo ang kainit sa kasuko karong panahuna, unyag kapawong niini, malimtan na usab ang isyu.
Panahon na karon nga tun-an og balik ang pagbuhi sa balaud nga nagsilot og kamatayon sa grabeng mga krimen. Angay bang pangbitayon ang mga drug lord nga nakaguba og mga kinabuhi bisan kon naa na sila sa bilanggoan? Ilakip ba ang kadtong nakapatay og kadaghan o kadtong nakahimo og linuog nga pagpatay sama sa nikutlo sa kinabuhi ni Christine Lee?
Ang uban sa mga netizen nagtuo nga angay ibugti ni bisan kinsa ang ilang kinabuhi sa kinabuhi sa ilang nabuhatan sa ingon. Naay uban nagtuo nga kini makapahadlok sa mga kriminal.
Apan kon makapahadlok ang death penalty, nganong sa mga nasod nga naa ning balaura naa gihapon ang luog nga mga krimen?
Angay nang seryusuhon kining discussion kabahin sa death penalty, labina karon nga bisan sa kampanya sa kagamhanan, nagpabiling buhi kaayo ang illegal drugs. Daghan usab ang mga kinabuhi nga nakutlo sa mga tawo nga nangagumon o high sa illegal drugs. Di lang kay debatihan kini panahon sa dunay makapatay-og nga krimen sa nasod.