MIBATI nag kahadlok ang mga residente sa mga bukirang barangay sa syudad sa Danao human gipatay ug gipanitan ang usa ka mag uuma sa sitio Agutayan, Barangay Lawaan niadtong Enero.
Nisamot kini sa pagkamatay ni Christine Lee Silawan, 16, nga susama og estilo sa pagpatay kang Trinidad Roble Batucan, 60, kinsa gipatay niadtong Enero 11.
Sama kang Silawan, gilaplapan sa iyang nawong hangtod sa dughan si Batucan.
Ang nakapahadlok sa mga lumolupyo mao ang mga estorya nga ang gihiwa nga bahin sa tawo nga gipatay gipaklay ug gikaon samga sakop sa kulto nga wa pa masayri ang ngan.
Mga 18 ka tawo ang gikataho nga mga miyembro niini.
Giingon nga gipangulohan kini ni Jonas Bueno, kinsa nagpuyo kaniadto sa bukiran sa Sogod, apan nilayas human sa police operation nga nakapatay sa iyang duha ka mga igsuon niadtong Enero 13.
Si Bueno nasikop sa siyudad sa Davao niadtong Biyernes sa hapon, Marso 15.
Si kapitan Josephine Andajao sa Barangay Cantican, bukirang dapit sa Danao City, nitug-an sa Superbalita Cebu nga sukad sa luog nga pagpatay kang Batucan, sayo na kaayo mangatulog ang mga tawo sa bukid.
Ang mga tinun-an sayo na usab nga buhian sa ilang mga magtutudlo ilabi na ang estudyante sa high school nga mga dalagita na.
KAHADLOK
Niadtong miaging adlaw, atol sa gipatawag nga meeting sa Danao City police station pinaagi sa ilang hepe nga si Police Supt. Maribelle Getigan, natuki ang tumang kahadlok sa duha ka mga barangay, Cahumayan ug Dungga.
Giingong adunay wa mailhing mga tawo nga manoktok sa mga pultahan sa balay panahon sa lawom nang kagabhion.
Nisamot pa ang ilang kalisang human mabalita ang kamatayon ni Silawan, kinsa napalgan nga patay na ug gilaplap ang panit sa nawong ug gikuha ang dila ug ubol-ubol niini nga sama sa nahitabo kang Batucan sa Barangay Lawaan.
Nikatap ang mga estorya sa bukid sa Danao nga di lang si Batucan ang gipatay sa grupo sa magsuong Bueno, aduna pay tulo nga wa lang ma- report sa pulis.
Giingon nga ang mga sakop sa kulto mopatay og tawo ug kuhaan kinig panit aron lutoong paklay ug ilang kan-on.
“Naay estorya ana, Sir, didto sa Lawaan nga dili lang kato ra ang hitabo daghan, daw. Naa pay tulo wala lang ma report. Didto pa sa Lusaran (bukirang barangay sa Cebu City) dapit, gipanitan pud kuno to. Kay ang estorya gihimong paklay,”matod ni Andajao.
Kining mao nga mga hitabo wa moabot sa kapulisan ug motino pa unsa ka tinuod.
Ang Lawaan dunay 23 kilometro nga gilay-on gikan sa kinapusoran sa siyudad sa Danao.
Balwarte kini kanhi sa mga rebeldeng New People’s Army (NPA) sa mga dekada 70 ug 80.
Mao usab ang ilang nadunggan nga taho sa mga tawo sa barangay Lawaan nga ang panit ug unod ni Batucan giluto usab sa tulo ka magsuon nga silang Junrey, Jovie ug Jonas Bueno.
GIHANGOP
Nalipay hinuon sila human masayod nga nadakpan na si Jonas Bueno sa syudad sa Davao.
Apan pabilin ang ilang kabalaka sanglit aduna pay nahabilin nga membro sa ilang kulto nga moabot ngadto sa 18 ka mga tawo.
Usa sa mga opisyal sa Police Regional Office 7 nga di lang magpahingan nagkanayon nga human mapatay sa engkwentro silang Junrey ug Jovie Bueno, si Jonas nga manghod nihulip nga pangulo sa kulto.
Giingon nga ang mga membro niini adunay daghang tattoo sa lawas nga dunay dagway sa demonyo sama sa nakita nga tattoo ni Jonas.
“Matapos mapatay yung dalawang magkapatid, si jonas na ngayon ang tumayong leader nila,” sulti sa opisyal sa Superbalita Cebu ubos sa hangyo nga di siya nganlan.
GIPAIMBESTIGAR
Si Sr. Supt. Manuel Abrugena wala pa maka dawat sa maong kasayuran labot sa maong kulto nga mangaon sa unod sa tawo ug panit nga himuong paklay.
Tungod niini, nimando siya sa Danao City police station nga susihon ang maong impormasyon gikan sa mga barangay kapitan.
“We are still verifying po how true is the report and I have already talked to the chief of police of Danao city police station na i confirm po itong lumabas na balita,” matod ni Abrugena.
Aduna nay mga pulis nga mag roving sa mga bukirang barangay sa syudad sa Danao uban ang mga sundawo gikan sa Task Force Cebu.
POSIBLENG TINUOD
Wa gisalikway ni Cebu Archbishop Jose Palma nga malagmit kulto ang nagbuhat sa pagpatay ug pagpanit ni Silawan sa Barangay Bankal, dakbayan sa Lapu-Lapu niadtong Lunes, Marso 11.
“Everything is possible. Kon mao nga klase sa kamatayon is very probable nga kulto nga, tungod kay lainlain mang kulto, may mga pamaagi sa kamatayon nga daw dili usual. Nganong kadaghang stab wounds? Mao gyud kini ang probability dunay sayop, dunay yabag nga pagtuo ug mga pilosopiya...” sigon sa arsobispo.
Siya nasubo sa kamatayon sa 16 anyos nga dalagita ug siya nag-ampo nga makonsensiya ang naghimo sa krimen ug mo-surrender.
Iya usab giampo nga makuha sa pamilya sa biktima ang hustisya ug wa nay susama nga krimen ang mahitabo.
“Normal lang ang tawo nga mamatay, in the sense nga tanan man gyud ta mamatay. Pero kon mao kini nga klase sa kamatayon, dako kaayo kasubo, siyempre sa atong komunidad,” pahayag ni Palma sa pakighinabi sa mga tigbalita human sa launching sa Pagsangyaw 2021 pagka Sabado, Marso 16, sa IC3 Convention Center.