DUNGAN sa pagsaulog sa ika-498 ka tuig dihang gisugdan ang pagsangyaw sa Kristiyanismo sa Sugbo, gilusad sa artsidyosesis sa Sugbo ang Pagsangyaw 2021 niadtong Sabado, Marso 16 sa IC3, dakbayan sa Sugbo.
Ang kalihokan nga nagdala sa tema nga “Gifted to Give,” tipik sa pagpangandam sa dakong kasaulogan sa Sugbo sa ika-500 nga anibersaryo sa Kristiyanismo sa 2021 nga pasiugdahan sa Commission on the Laity (COL).
Sa launching, gipakita ang opisyal nga logo sa Pagsangyaw 2021, gipabati usab ang theme song ug ang pag-ampo alang sa maong kalihokan nga himuon hangtod sa 2021.
Sa logo, makita ang mapa sa Sugbo ug ang sakayan nga giluwanan sa mga tawo nga nagrepresentar sa ilang misyon sa pagsangyaw sa pagtuo sa tibuok kayutaan.
Anaa usab ang krus sa logo nga nagrepresentar sa unang krus nga giugbok sa yuta sa Sugbo dihang nahiabot ang unang mga magsasangyaw nga maoy nagsimbolo sa pagtuo sa mga Kristiyano, ang krus nga nagpahinumdom sa mga tawo nga si Hesus namatay ug nabanhaw aron maluwas sa ilang mga sala.
Ang pito ka silaw sa adlaw nga makita usab sa logo, nagrepresentar sa pito ka mga gasa sa Balaang Espiritu ug ang letra nga “M” nga may korona sa ibabaw, nagrepresentar ni Birheng Maria, ang rayna sa mga apostoles ug sa kalibotan. Naa kini gitisok sa tiilan sa krus nga nagsimbolo sa pagtugyan sa Ginuo sa iyang anak ngadto kang Maria.
Human sa launching, gisunod ang misa nga gipangulohan ni Cebu Archbishop Jose Palma.
Sa iyang wali, ang arsobispo namulong nga bulahan ang Sugbo kay dinhi sa Sugbo nagsugod ang Kristiyanismo sa Pilipinas ug dinhi nahitabo ang unang bunyag, unang pagtanom sa krus ug pagsaulog sa kapistahan sa Señor Sto. Niño.
“Gibuhat nato kini tungod sa atong malipayon nga pagpasalamat sa Diyos, gasa sa pagtuo. Buhaton nato kini tungod sa atong pagtuo nga gitawag kita sa Ginuo,” pasabot ni Palma.
Matod niya, sa sinugdanan pa lang, ang mga layko gitawag na isip mga magsasangyaw sa maayong balita sa gugma, kaluoy ug kaluwasan ni Kristo ug kini angay nga ipaambit ngadto sa uban.
“Make other people realize that we are happy to be Catholics,” dugang ni Palma.
Si Fe Barino, chairperson sa COL, niingon nga karong Marso 24, magsugod na og sangyaw matag Dominggo, ang mga layko nga napili isip mga magsasangyaw sa ilang mga parokya, sa dili pa o human sa misa.
Sumala niya, tukma ang Pagsangyaw 2021 karong mga panahona nga daghang mga kaso sa pagpamatay, ang uban niluog.
“Hopefully, niining programa sa Pagsangyaw, duna gyuy kausaban sa palibot, sa ilang pamilya, sa tagsatagsa ka kinabuhi. Kay mao may atong isangyaw ang gugma sa Ginuo nga nausab ta pinaagi sa pagtuo nga atong nadawat,” dugang ni Barino. SCG