WA mabalaka ang director sa Police Regional Office 7 Chief Supt. Debold Sinas sa pagpasakag kasong administratiba batok kanila ngadto sa Ombudsman for the Military and Other Law Enforcement Offices (MOLEO) sa mga militanteng pundok sa Sugbo nunot sa tensyon atubangan Camp Sergio Osmeña atol sa paghandom sa Edsa Revolution niadtong Pebrero 25.
Kasong serious misconduct, grave abuse of authority/oppression, conduct unbecoming of a public officer, discourtesy in the conduct of official duties, ug kalapasan sa Batas Bilang Pambansa 880 kun Public Assembly Act.
Gisaway sa mga militanteng pundok ang kadagkoan sa PRO 7 human gipatukaran silag Voltes 5 atol sa nagpadayon nilang programa atubangan sa kampo.
Matod ni Sinas nga katungod ni bisan kinsa ang pagpasakag kaso kanila nga mga sakop sa kapulisan ug ila kining tubagon.
Apan isunod usab nila ang pagpasakag kasong criminal sa mga lider sa mga raliyesta nga nakita sa CCTV camera sa PRO 7 sama nilang Phoebe Zoe Maria Sanchez sa Karapatan Central Visayas; Jaime Paglinawan sa Bayan Central Visayas; ug John Ruiz III sa Bayan Muna Central Visayas.
Giingong niguba ang grupo sa gate barrier sa kampo atol sa kalihukan ug ilang dakpon kon aduna nay warrant of arrest nga ipasupot ang korte.
“I don’t care, di tubagon, pagka naay kaso di tubagon. Kami nag file pud mig kaso sa ilaha. Kon mogawas na ang warrant, dakpon pud namo sila. Ingon ana lang man na,” matod ni Sinas.
Nailhan na ang mga tawo nga maoy nagguba sa barrier sa ilang gate sa PRO 7, lakip na ang mga leader. AYB