ADUNAY 14 ka mga barangay nga giila sa kapulisan ug sa Commission on Elections nga ‘priority barangays’ sa dakbayan sa Mandaue alang sa umaabot nga piniliay karong Mayo.
Kini ang usa sa nakab-ot sa joint PNP-AFP workshop alang sa election.
Ang mga barangay naglakip sa Paknaan, Labogon, Subangdaku, Canduman, Banilad, Umapad, Looc, Maguikay, Tipolo, Tabok, Pagsabungan, Cabancalan, Alang-alang ug Casuntingan.
Gihimo ang tunga sa adlaw nga election workshop aron pagsuta sa himuon nga dugang mga security plan sa habig sa mga pulis ug kasundaluhan atol unya sa piniliay.
Nitambong usab ang assistant election officer sa Mandaue, Jacqueline Reuyan, uban sa kadagkuan sa mga magtutudlo sa pampublikong tunghaan sa dakbayan sa Mandaue.
Gipasabot ni Police Sr. Supt. Julian Entoma, director sa Mandaue City Police Office, nga ni-identify sila sa 14 barangay aron hatagan sa mas dugang pagtagad ug dugangan og pwersa sa kapulisan.
Usa sa factor sa pagpili niini mao kadtong mga barangay nga adunay 5,000 pataas nga mga botante, ug kansang mga tunghaan adunay daghan ang mga entrance ug exit, sama sa Mandaue Central School, diin upat ka barangay ang dinhi mohimo sa pagbotar.
Naa sa 11 ka mga tunghaan ang polling centers sa 14 ka mga barangay.
“Atong pangandaman ani, kining mga supporters kay kini man sila ang init kaayo, tungod sa ilang grabeng pagsuporta sa ilang mga politiko nga gisuportaran. Nya kon daghan kaayo ang mga botante, kulang ra kon duha ka mga pulis ra atong ipa-secure, modugang tag upat, sa mga barangay nga naay 5,000 up nga mga botante,” gipasabot ni Entoma sa Superbalita Cebu.
Dugang ni Entoma nga ilang i-address ang problema sa niagi nga piniliay nga mao ang pagpadala sa ballot boxes alang sa pag-canvass, kon asa ipahimutang ang mga sakyanan sa gobyerno nga sakyan sa magdala sa ballot box, uban ang tagsa ka watcher sa matag kampo. FMD