SA pagpangulo ni Philippine Drug Enforcement Agency (Pdea)-Northern Mindanao Director Wilkins Villanueva nasikop ang usa ka kanhi mayor ug number 7 most wanted didto sa Northern Mindanao.
Kuyog ang Oroquieta City Police Station sa pagpangulo sab ni Police Senior Inspector Ramil Waper ilang gisilbi ang search warrant batok sa mga suspek.
Giilang sila si Liwaya Angcap-Paras, 40, kanhi mayor sa lungsod sa Midsalip, Zamboanga del Sur ug anak ni kasamtangang Mayor Leonida Angcap sa Midsalip kinsa giila sab karon nga anaa sa listahan sa narco-politician ni Presidente Rodrigo Duterte.
Lakip sa gisikop ang kapuyo niini nga si Leander C. Lumantas, 47, residente sa susamang dapit.
Nakumpiska sa operatiba ang duha ka M4 5.56 assault rifles, pito ka magazine nga adunay 5.56 ammunitions, usa ka 45 kalibre nga adunay walo ka buhing bala ug laing box sa kalibre 45 nga adunay sulod 50 ka buhing bala.
Lakip sa nasakmit sa ilang posisyon ang tulo ka dagkong pakete sa gitouhang shabu, 12 ka pakete nga gagmay ug tulo ka cellular phone. Moabot ngadto sa 25 ka gramos sa gitouhang shabu ang kinatibuk-ang nasakmit sa ilang posisyon.
Matud ni Villanueva nga gawas nga anaa kini sa listahan sa narco-politician, ika number 7 kini sa drug list sa ilang buhatan.
Kasong kasupakan sa Republic Act 9165 kon Comprehensive Dangerous Drugs Act of 2002 ang atubangon sa mga dinakpan.