SA DIHANG nagsugod na ang kampanya sa mga pili-unon pagka-senador ubos sa Partido Demokratiko ng Pilipinas (PDP-Laban) niadtong Pebrero 12, kanunay gipanghambog sa mga tigpamaba ni Congressman Pantaleon Alvarez nga miadto sila didto sa Luzon ug Visayas, kay kuno giimbitar sila ni Presidente Rodrigo Roa Duterte kay i-indorso.
Kung atong sumadahon sa di binugo nga pag-analisar, nganong didto man kuno sila sa Luzon o kaha sa Visayas magpa-indorso, nga di man sila kandidato didto?
Nia man sa probinsiya sa Davao del Norte sila namolitika, kini nagtima-ilhan lang nga gusto nilang linglahon ang katawhan sa DavNor nga sila ang gisuportahan sa pangulo.
Unsay nahitabo, aron ingnon nga gi-indorso sila? Ningsipyat sila maoy migunit sa kamot sa presidente ug ilang giisa, si Presidente Duterte na hinuon ang ilang gi-indorso ug pag-abot dinhi, gi-post gilayon nila sa social media.
Migawas na ang tinuod, niadtong Biyernes sa gabii samtang gihimo dinhi sa dakbayan sa Davao ang dakong rally sa hiniusang PDP-LBAN ug Hugpong Ng Pagbabago (HNP) didto sa Crocodile Park, sa dihang nahibaw-an ni sa atong presidente nga naa sila si Congressman Pantaleon Alvarez, Edwin Jubahib ug Allan Dujali, wala magpakita ang presidente sa rally.
Ang nahitabo, didto lang intawon sa ubos ang team Alvarez walay mitagad murag yanong tawo nga mitan-aw sa dakong rally, ug kung imong tan-awon ang ilang gipangsul-ob murag mga istambay sa kanto nga unta kanhi speaker man sa 17th congress.
Dinhi na karon nato nahibaw-an nga tumo-tumo ug bakak ang gipangyawyaw sa kampo ni Alvarez nga imbitado sila sa mga rally didto sa Luzon ug Visayas, sa laktud bisag wala sila imbitaha miadto sila aron kunohay ingnon nga malakas pa sila sa presidente, pero ang tinuod dugay ra silang gisuka kay giluod ang pangulo kanila.
Kung imbitado pa sila, bisag wala ang atong presidente mosaka sila sa entablado? Pero wala! Tungod kay kalaban man sila ni Mayor Sara Duterte-Carpio.
Karon nabisto na ang pagkabakakon niining politikoha, adunay nag-ingon nga dili daw si Presidente Duterte ang makapadaug sa kandidato diha sa unang distrito sa DavNOr, kun di ang katawhan diha.
Oo tinuod na, pero ang presidente adunay gahom nga walay suporta sa infra ang inyong distrito kung di iya ang congressman nga inyong gipili, kay kon kinsa’y mosunod nga speaker sa 18th congress pagbuot kana sa presidente.
Angay lang tingali nato suportahan si Mayor Sara, tungod kay hayag kaayo ang tima-ilhan nga siya ang mosunod nga presidente sa atong nasud human sa termimo sa iyang amahan karong 2022.
So, mag-sip-isip namo katawhan sa DavNor, lisud kung di kakampi sa presidente ang gobernador, ug congressman, lisud kaayo.