MAGUINDANAO -- Gisang-at na sa Maguindanao Provincial Prosecutors Office ang kaso nga kalapasan sa Section 4 sa Republic 10168 kun Crime of Financing Terrorism batok sa usa ka kandidato.
Giila ang suspek nga si Anwar Upahm nga nagpapili pagka-vice mayor sa Shariff Aguak, Maguindanao.
Si Upahm kanhi sab nga manager sa ARMM HELPS Program ilawom sa liderato ni kanhi ARMM governor Mujiv Hataman.
Gitagaan ni Maguindanao Provincial Prosecutor Rohaira Lao og napulo ka adlaw si Upahm aron magsumitir sa iyang counter affidavit.
Gi-reklamo ang suspek sa iyang paryente nga si Jeyhar Upahm human niya gi-protektahan ug mihatag pa sa tabang nga pinansiyal sa mga giisip nga terorista ug kaaway sa gobyerno.
Sa gipadala nga litrato sa korte isip ebidensiya, makita si Upahm nga kauban si Kumander Samad Simpal sa Bangsamoro Islamic Freedom Fighters (BIFF).
Gipagawas niadtong Marso 7, 2019 ang subpoena batok kang Upahm gikan sa Maguindanao Provincial Prosecutors Office.
Sa kasamtangan gihulat na lamang sa korte ang tubag ni Upahm sa mga akosasyon batok kaniya uban ang gipanumpa nga pahayag sa iyang mga saksi.