BISAN kon dunay bagyong 'Chedeng', apan dili kini makatapak sa dakong panginahanglanon sa tubig taliwa sa nasinating tumang kainit sa Sugbo ug kasikbit nga mga dapit sa Kabisay-an kay minos lang ang iyang dala nga uwan.
Si Romeo Aguirre, weather specialist sa Philippine Atmospheric, Geophysical and Astronomical Services Administration (Pagasa) Mactan, niingon nga dili na mokusog ang bagyong Chedeng.
Siya nipasabot nga bisan og init ang kadagatan nga agian sa bagyo nga mao unta gasolina niini nga mokusog, apan hinay ang iyang hangin sa ubos samtang kusog ang hangin sa ibabaw nga maoy makagusbat sa iyang sirkulasyon.
“Magpabilin siya nga TD (tropical depressesion) o ma-LPA (low pressure area) siya before mo-landfall. Naa man siya duol sa equator. Basta duol sa equator, way tendency motuyok ang bagyo,” matod ni Aguirre dihang nahinabi sa Superbalita Cebu pagka Dominggo, Marso 17.
Si Aguirre nidugang nga katag ug hinay ngadto sa kasarangan nga pag-uwan ang masinati sa Sugbo sa bagyong Chedeng ug dili kini maapektuhan sa hangin.
Sumala niini gipaabot mo-landfall ang bagyo sa Davao Oriental sa Lunes sa gabii, Marso 18 o Martes sa buntag, Marso 19.
Ang bagyong Chedeng nakasud sa Philippine Area of Responsibility (PAR) alas 11 sa buntag pagka Dominggo, Marso 17, nga nagdala sa hangin nga may kusog nga 45 kilometros matag oras duol sa iyang sentro ug pag-unos nga moabot ngadto sa 60 kilometros matag takna.
Nag-irog kini 25 kilometros matag oras pakasadpan. a pagsuwat ning balita, ang bagyong Chedeng naa nahimutang mga 830 kilometros sa sidlakan sa Hinatuan, Surigao del Sur sa Mindanao. (SCG)