SUMALA pa sa usa ka editoryal ning maong pamantalaan, gihakop sa kahadlok ang pipila ka mga lomulupyo sa syudad sa Lapu-Lapu tungod sa linuog nga pagpatay sa 16-anyos nga estudyante nga si Christine Lee Silawan.
Nikatap sab ang mga huhunginhong nga buhat kini sa usa ka kulto nga gani mokaon sa ilang gilaplap nga bahin sa lawas sa tawo. Angay kining susihon ug mahibaw-an lang kini kong masikop nga buhi ang mga mamumuno ni Christine ug masukit-sukit pag-ayo.
Basin duna na tay makuhang kasayoran karon nga nadakpan ang principal suspect sa pagpatay sa usa ka 60-anyos nga mag-uuma sa syudad sa Danao ug gitumbok usab nga usa ka person of interest sa pagpatay ni Christine.
***
Kinsa ba tuod ang di mahadlok kon dunay kulto nga mokaon sa unod sa tawo. Gitawag kini nga cannibalism nga uso kaniadto sa mga nitibo nga nagpuyo sa gagmay nga mga isla sa Pacific Ocean.
Usa ka turista nga niadto sa usa sa maong mga isla nahadlok nga duna pay mga cannibal nga nahibilin. Nangutana siya sa usa ka tiguwang, “Noy, duna pa bay mga cannibals dinhi sa inyong dapit?” Tubag sa tiguwang, “Wa na, Dong. Nahurot na namo og kaon.”
Ang mga cannibals matod oa di ganahan og tawong daot kay lat-anan pa. Di sab ganahan og tambok kay taas ilang cholesterol. Dihay amahan ug anak nga mga cannibals nga nag-hunting og tawo. Nakakita silag guwapa ug seksi nga babaye. Matod pas amahan, “Dong, ato ning dakpon nga buhi. Si mama nimo maoy atong kan-on.”
***
Si Jonas Martel Bueno, usa sa tulo ka mga guspetsado sa pagpatay ni Trinidad Batucan, 60 anyos, sa syudad sa Danao, nasikop niadtong Marso 15 sa mga sakop sa National Bureau of Investigation (NBI)-Davao ug Criminal Investigation and Detection Group (CIDG) Davao City sa Barangay Matina Crossing Guadalupe, Davao City.
Ang iyang duha ka igsuon nga suspetsado usab, sila si Junrey ug Juvy, napatay sa usa ka police operation niadtong Enero 13. Ang tulo ka mga managsuon giingong mga sakop sa usa ka kulto.